स्याङ्जा जिल्लामा मात्रै नभएर देश विदेशमा समेत चर्चामा रहँदै आएको वालिङ नगरपालिका स्वमूल्याङ्कनमा समेत कमजोर देखिएको छ l हालै संघीय तथा सामान्य प्रशासन मन्त्रालयले सार्वजनिक गरेको २०७९ /८० को स्वमूल्याङ्कन नतिजामा वालिङलाई ३ वटा गाउँपालिकाले पछाडि पारिदिएका छन् l स्थानीय सरकार संचालन ऐन -२०७४ बमोजिम गरिएको स्वमूल्याङ्कनमा ९४ अंक प्राप्त गर्दै अर्जुनचौपारी गाउँपालिका सबैभन्दा अग्रस्थानमा रहेको छ l दोस्रो स्थानमा रहेको आँधिखोला गाउँपालिकाले ९०.२५ स्थान प्राप्त गरेको छ भने तेस्रो स्थानमा रहेको फेदीखोला गाउँपालिकाले ८७.७५ अंक प्राप्त गरेको छ l चौंथो स्थानमा रहेको वालिङ नगरपालिकाले जम्मा ८६.७५ अंक प्राप्त गरेको छ l
स्थानीय तहको कार्यप्रक्रिया र उपलब्धिहरूको बारेमा लेखाजोखा गरी सबल र दुर्बल पक्षहरूको पहिचान गर्न, विकास र सुशासनको पक्षमा रहेका कमीकमजोरीहरूको बारेमा जानकारी लिन, आवधिक समीक्षाको लागि आधार प्राप्त गर्न, स्थानीय सरकारहरूलाई सक्षम, प्रभावकारी र तुलनायोग्य बनाउन स्थानीय सरकार संचालन ऐन -२०७४ मा स्थानीय तहले आफ्नो संस्थागत क्षमता स्वमूल्याङ्कन गर्नुपर्ने व्यवस्था छ l
शासकीय प्रवन्ध, संगठन तथा प्रशासन, वार्षिक बजेट तथा योजना व्यवस्थापन, वित्तीय एवम् आर्थिक व्यवस्थापन, सार्वजनिक सेवा प्रवाह, न्यायिक कार्यसम्पादन, भौतिक पूर्वाधार, सामाजिक समावेशीकरण, वातावरण संरक्षण तथा विपद् व्यवस्थापन, सहकार्य र समन्वय गरी १० वटा स्वमूल्याङ्कनका विषयक्षेत्रहरू रहेका छन् l
समग्रमा चौंथो स्थानमा रहेको वालिङ नगरपालिका सहकार्य र समन्वयको सूचकमा कमजोर देखिएको हो l सहकार्य र समन्वयमा सबैभन्दा कमजोर देखिएको पुतलीबजार नगरपालिकाले ६ पूर्णाङ्कमा ०.५ अंक प्राप्त गरेको छ भने वालिङले जम्मा १ अंक प्राप्त गरेको छ l चापाकोटले पनि १ अंक प्राप्त गर्दै वालिङलाई साथ दिएको छ l सहकार्य र समन्वयको सूचकमा आँधिखोला र अर्जुनचौपारी गाउँपालिकाले पूर्णाङ्कमा पूर्णाङ्कनै प्राप्त गर्दा गल्याङ नगरपालिका पनि अन्य पालिकाको तुलनामा कमजोर देखिएको छ l सहकार्य र समन्वयको सूचकमा गल्याङ नगरपालिकाले जम्मा ३ अंक प्राप्त गरेको छ l
सहकार्य र समन्वयको सूचकमा दुइ वा दुइ भन्दा बढी स्थानीय सरकारको सरकारको विषयमा बन्ने समितिहरूको गठन र संचालन, अन्तर सरकारी समन्वय तथा सहजिकरण, अन्तर स्थानीय सरकार साझेदारी र जिल्ला समन्वय समितिसँगको समन्वय लगायतका विषयहरू पर्दछन् l
सहकार्य र समन्वयको सूचकमा वालिङ नगरपालिकाले २०७६/७७ को स्वमूल्याङ्कन ५ अंक प्राप्त गरेको थियो भने २०७७/७८ मा ६ अंक प्राप्त गरेको थियो l २०७८/७९ को नतिजा र २०७९ /८० को नतिजा बराबर अर्थात् १ नै रहेको छ l पछिल्लो नतिजा अनुसार वालिङले शासकीय प्रवन्धमा (८.५/९), संगठन तथा प्रशासनमा (८/८), वार्षिक बजेट तथा योजना व्यवस्थापनमा (९ /११) , वित्तीय एवम् आर्थिक व्यवस्थापनमा (१०.५/११), सार्वजनिक सेवा प्रवाहमा (१६/१६), न्यायिक कार्यसम्पादनमा (७/७), भौतिक पूर्वाधारमा (११.२५/१३), सामाजिक समावेशीकरणमा (७ /१०), वातावरण संरक्षण तथा विपद् व्यवस्थापनमा (८.५/९), नतिजा ल्याएको छ l