गलत प्रवृत्तिको विरुद्ध अनेरास्ववियु निरन्तर लडाइँ लड्छ
माघ २०, २०७८
सानै उमेरदेखि नै राजनीति तर्फ आकर्षित हुनुभएका सगुन राना स्याङ्जाको विद्यार्थी राजनीतिमा परिचित नाम हो।अनेरास्ववियु स्याङ्जाको अध्यक्ष एवं नेकपा एमाले स्याङ्जाको जिल्ला कमिटी सदस्यको भूमिकामा रहनु भएका हरिनास गाउँपालिका निवासी २७ वर्षिय रानाको राजनीतिक र व्यक्तिगत जीवन यात्राका बारेमा हाम्रा संवाददाता रवि थापाले लिएको अन्तरवार्ताको सम्पादित अंश।
१)सर्वप्रथम त म तपाईंको राजनीतिक यात्राको बारेमा जान्न चाहन्छु।हजुरको राजनीतिक यात्रा कहिले सुरु भयो?
प्रश्नको लागि धन्यवाद। म सानै उमेर देखि नै राजनैतिक र सामाजिक बिषयहरुमा विशेष इच्छा राख्दथे। त्यो मेरो रुचिको विषय थियो।विद्यालय तहमा हुँदा देखि नै राजनैतिक घटनाक्रमहरुलाइ नजिकबाट बुझ्ने प्रयत्न गर्दथेँ। सांगठनिक रुपमा आजभन्दा करिब एक दशक अगाडि अनेरास्ववियुको प्रारम्भिक कमिटीबाट मेरो राजनैतिक यात्रा सुरु भएको हो।
२) नेकपा एमालेको आठौं जिल्ला अधिवेशनबाट सर्वसम्मत रुपमा जिल्ला सदस्य चयन हुनुभएको छ। अब कसरी अघि बढ्नुहुनेछ?
मैले नेकपा एमाले स्याङ्जाको ८ औं जिल्ला अधिवेशनबाट जिल्ला कमिटीमा प्रतिनिधित्व गर्ने अवसर प्राप्त गरेको छु। यो अवसरको निम्ति यहीँबाट पार्टीको नेता तथा प्रतिनिधिहरु प्रति आभार प्रकट पनि गर्न चाहन्छु।तुलनात्मक रुपमा उमेरले कलिलो तर जिम्मेवारी वहनले अब्बल साबित गर्ने मेरो ध्येय जरुर हुनेछ। राजनीतिप्रति घट्दो आकर्षण र बढ्दै गरेको वितृष्णालाइ हाम्रो पुस्ताले सकारात्मक रुपमा चिर्नु पर्नेछ ।त्यसैको निम्ति म जिम्मेवार रहेको तहबाट पहल हुनेछ।
३) तपाई त स्याङ्जा जिल्लाको अनेरास्ववियु अध्यक्ष पनि हुनुहुन्छ ।त्यो पदमा बसेर जिल्लाका विद्यार्थीको हकहितमा आवाज उठाएको त पाइँदैन त । पद ओगटेर बस्ने कि काम पनि गर्ने? मैले अनेरास्ववियु स्याङ्जाको नेतृत्व सम्हाल्ने अवसर प्राप्त भएको केही महिना मात्र भएको छ । त्यही पनि मेरो निम्ति पदीय जिम्मेवारी गौण कुरा हो । त्यसको पुष्टि मेरो अहिलेसम्मको राजनैतिक यात्राले गरिसकेको छ । म पदीय जिम्मेवारीमा नरहँदा पनि विद्यार्थी आन्दोलनसंँग निरन्तर जोडिएको छु। त्यसको प्रमाण स्याङ्जाको ठुला क्याम्पसहरु देखि दुरदराजका विद्यालयका विद्यार्थीहरुसंँग सुरक्षित छन्। म नेतृत्वमा आइसकेपछि लर्बराएर धिमेधिमे भइसकेको स्याङ्जाको विद्यार्थी आन्दोलनलाई अनेरास्ववियुको नेतृत्वमा गति प्रदान गर्दैछौँ। हाम्रो तल्लो तहका सम्मेलनहरु कतै सकिए कतै अन्तिम चरणमा छन्। अहिले कोभिडको कारणले नियमित अभियानलाई तत्काल गति दिन सकेका छैनौं तर स्वयंसेवकको भूमिका मार्फत हामीले यो महामारीको विरुद्ध लड्न स्थानीय देखि जिल्ला प्रशासनसंग समन्वय गरिरहेका छौं। जिल्ला भित्रका विद्यार्थीहरुलाई कहिँ कतै दु:ख पर्दा अनेरास्ववियुको नेताहरुलाइ सम्झिदा हुन्छ ।सगुन रानालाइ सम्झिदा हुन्छ। हामी सारथि बन्न हरदम तयार छौं।जिल्ला भित्र अन्य संगठनको यस्तो कृयाशिलता देख्नु भएको छ ? सबभन्दा कृयाशिल संगठनलाई कुन नजरले शिथिल भएको देख्नु भयो कुन्नी ?
३) आफ्नो माउ पार्टीको सरकार हुदा चुइक्क आवाज ननिकाल्ने तपाईंहरू,अहिले कांग्रेस सरकार हुँदा हरेक कुराको खरो विरोधमा उत्रिएको पाइन्छन् नि?
हामी स्वभाविक रुपमा नेकपा एमालेमा आस्था राख्दछौ। हाम्रो मुल पार्टी एमाले हो र एमाले हुनुमा गौरव पनि छ।तर हामी आलोचनात्मक चेत राख्दछौ, राख्नु पनि पर्दछ ।मुलतः पछिल्लो समय नेपाली विद्यार्थीले आफ्नो साख गुमाउदै गएको कुरा साचो हो। हाम्रा प्रवृत्तिमा पनि कमीकमजोरी भए होलान्। त्यसको निर्मम ढंगले समिक्षा गरिनु पनि पर्दछ तर तपाईंको पश्नमा भनिए जस्तो गरि हामी एकाङ्की बनेका छैनौं ।भलै पार्टी सरकारमा हुँदा आन्दोलनको स्वरुप फरक होला तर गलत प्रवृत्तिको विरुद्ध अनेरास्ववियु निरन्तर लडाइँ लड्छ, त्यसको प्रमाणको निम्ति हाम्रो विगत हेरे पुग्छ।
४) बजारमा एकप्रकारको हल्ला छ । स्याङ्जा जिल्ला अनेरास्ववियु अध्यक्ष सगुन राना पदको लागि मात्र पछि लाग्छ भन्ने कुरा। यो कुरा सत्य हो?
यो प्रश्नको त म ठाडै अस्वीकार गर्दछु म । मेरो राजनैतिक यात्रालाइ नजिकबाट नबुझ्नेले मात्र यस्तो प्रश्न गर्न सक्दछ ! १७ बर्षको कलिलो उमेर देखि राजनैतिक आन्दोलनमा प्रत्यक्ष रुपमा निरन्तर छु । आजसम्म कति समय पदीय जिम्मेवारीमा रहे ? कुन सरकारी नियुक्ति लिए ? पार्टीमा एक कार्यकाल गाउँ कमिटी उपाध्यक्षको जिम्मेवारीमा रहेँ। त्यसपछी भर्खरै जिल्ला कमिटी जिम्मेवारी पाएको छु । त्यो भन्दा बाहेक त पदीय जिम्मेवारीमा नरहे पनि निरन्तर रुपमा यही आन्दोलनमा सक्रिय छु। अनि कसरी पदको लोभी भए ? जसले हल्ला गर्छ वास्तवमा उनीहरु नै काम गर्दैनन्। त्यसैले मलाई लाग्दछ मेरा बारे चलाइएको हल्लामा कुनै सत्यता छैन।
५) अगामी चुनावमा केही पदमा उम्मेदवारी दिने सम्भावना कतिको छ?
निश्चित उद्देश्य सहित समाज परिवर्तनको अभियानमा लागेको एउटा राजनैतिककर्मीको नाताले जनता माझ गएर मत प्राप्त गर्ने इच्छा त स्वभाविक रुपमा छ रहन्छ तर त्यो भन्दा पनि मुख्य कुरा यो आन्दोलनमा निरन्तर रहने र जनताको मन जित्ने कुरा प्रधान हो भन्ने लाग्दछ। त्यसैले तत्काल त्यो बारेको सोचेको छैन !
