नेपाली काँग्रेसले खगेन्द्रराज रेग्मी स्मृति पुस्तकालय स्थापना गर्ने
साउन ०४, २०८१ 
युवराज पौडेल, स्याङ्जा
युवराज पौडेल, स्याङ्जा 
नेपाली काङ्ग्रेस स्याङ्जाले पूर्व जिल्ला सभापति तथा पूर्व राष्ट्रिय सभा सदस्य स्व. खगेन्द्रराज रेग्मीको स्मृतिमा पार्टी कार्यालय स्याङ्जामा खगेन्द्रराज रेग्मी स्मृति पुस्तकालय स्थापना गर्ने भएको छ । बिहिबार पार्टी कार्यालय अभियानपथमा बसेको जिल्ला कार्यसमितिको बैठकले उक्त निर्णय गरेको हो ।
त्यस्तै काङ्ग्रेस स्याङ्जाले वीपी स्मृति दिवसको अवसरमा श्रावण ६ गते पालिकास्तरमा रचनात्मक कार्यक्रमहरु गर्ने भएको छ । नेपाली कांग्रेसका पुर्व सभापति तथा संविधान सभा सदस्य कमल पङ्गेनीको छैटौं स्मृति दिवसको अवसरमा श्रावण २० गते पार्टी कार्यालय स्याङ्जामा रक्तदान कार्यक्रम गरिने स्याङ्जा काङ्ग्रेसका सचिव दामोदर लम्सालले जानकारी दिनुभयो ।
बैठकले नवगठित नेपाली कांग्रेससहितको सत्ता समिकरणमा बनेको सरकारलाई सुशासनका साथ जनताका पक्षमा काम गर्ने अपेक्षाका साथ हार्दिक बधाइ ज्ञापन समेत गरेको छ ।
काङ्ग्रेस स्याङ्जाको बैठकले गत असारको अन्त्यमा बाढी र पहिरो कारण हुन पुगेको क्षतिको यकिन गरि शीघ्र राहत वितरणमा लाग्न सरकारको ध्यानाकर्षण गरेको छ । साथै आफ्ना सबै माताहातका निकायहरुलाई सम्भावित थप क्षतिका लागि सतर्कता अपनाउँदै राहत र उद्धार कार्यमा सक्रिय रहन निर्देशन गरेको सचिव लम्सालले बताउनुभयो ।
