भीरकोटमा गौमुत्र प्रशोधन सुरू
कार्तिक ०३, २०८०
स्याङ्जाको भीरकोट नगरपालिकामा गौमुत्र प्रशोधन सुरू भएको छ l नगरपालिकाको वडा नं ८ मा संचालित छोरेडाँडा गौशालाले गौमुत्र प्रशोधन सुरू गरेको हो l आधुनिक प्रशोधन मेसिन प्रयोग गरी गहुँत प्रशोधन शुरू गरिएको गौशाला व्यवस्थापन समितिका अध्यक्ष खुमकान्त खनालले जानकारी दिए l
“गौमुत्रको उपयोगिताको बारेमा स्थानीय समुदायलाई जानकारी गराउने र प्रशोधित गौमुत्र स्थानीयस्तरमै खपत गर्ने गौशालाको पहिलो योजना छ l करिब १ लाख ५० हजार पर्ने आधुनिक मेसिन प्रयोग गरी गौमुत्रको प्रशोधन सुरू गरिएको हो l उत्पादन बढी भएको खण्डमा आफ्नै ब्राण्ड सहित बजारमा बिक्रिवितरण गर्ने हामीले सोच बनाएका छौं l” गौशालाका संरक्षक खनालले भने “गौशालाको बहुआयामिक विकास गर्दै यसलाई आत्मनिर्भर बनाउनु हाम्रो उद्देश्य हो l त्यसैले हामीले भर्मी कम्पोस्ट मलको पनि उत्पादन गर्न सुरू गरेका छौं l गाइको गोबर प्रशोधन गरी सुगन्धित अगरबत्ती बनाउने तयारीमा छौं l”
गौशाला व्यवस्थापन समितिका अनुसार गौशालामा रहेको गहुँत प्रशोधन मेसिनबाट दैनिक १० लिटरसम्म प्रशोधित गौमुत्र उत्पादन गर्न सकिन्छ । प्रशोधित गहुँत प्रति लिटर ४ सय रूपैयाँ भन्दा बढीमा बिक्रि गर्न सकिने बताइएको छ l (गोअर्क) बिक्रीबाट भएको आम्दानी गाई व्यवस्थापनमा खर्च हुनेछ । गौशालामा रहेको गाईहरुबाट स्थानीयलाई समेत धेरै फाईदा भएको समितिका अध्यक्ष खुमकान्त खनालले जानकारी दिए । स्थानीयले मर्दापर्दा देखि पुजाआजामा समेत यहीका गाईको दुध, गहुँत लगायतका सुविधा लिँदै आएका छन् । गौशालाले दान प्रयोजनका लागि प्रति गाई ५ सय रूपैयाँ लिने गरेको छ l
