भीरकोट बडामौलाकालिका
असोज २९, २०८०
कुनै समयमा भीरकोट बडामौलाकालिका समस्त भीरकोटकै ऐतिहासिक तथा राजनीतिक र सामरिक दृष्टिले महत्त्वपूर्ण मन्दिर थियो ।भीरकोट बडामौलाकालिका मन्दिर सिद्धार्थ राजमार्गको बयरघारी बजारदेखि ९ किलोमिटर दूरीमा पूर्वतर्फको डाँडामा अवस्थित छ । सामुद्रिक सतहदेखि ११०० मिटरको उचाइमा रहेको योमन्दिरक्षेत्र प्राकृतिक हिसाबले पनि अत्यन्त रमणीय छ। यहाँबाट उत्तरतिरका अन्नपूर्ण, माछापुच्छ्रे, धौलागिरिलगायतका मनोरम हिमश्रृङ्खलाहरू देख्न सकिन्छ । साथै आँधीखोला उपत्यकासहित पर परसम्म पहाडी श्रृङ्खलाहरू पनि यस क्षेत्रबाट देख्न सकिन्छ ।यो मन्दिर प्यागोडा शैलीमा निर्माण गरिएको छ । पहिले ढुङ्गा, माटो र काठद्वारा निर्मित मन्दिरको पुनर्निर्माण गर्दा आधुनिक निर्माण सामग्रीको प्रयोग गरिएको छ । मन्दिर दक्षिणतर्फ फर्किएको छ । दक्षिणतिरकै दोस्रो खण्डमा मौलो गाडिएको तत्कालीन भीरकोटका अन्य मौजाहरूमध्ये यो मौजा सबैभन्दा मुख्य भएकाले यसलाई बढा पनि भनिन्छ । त्यतिबेलाका भीरकोट राज्यभित्र पर्ने विभिन्न मौजाहरू यहाँबाट शासित थिए।
यो मन्दिरभित्र विभिन्न अस्त्रशस्त्रहरू भण्डारण गरिन्थ्यो । अहिले पनि केही अस्त्रहरू देख्न सकिन्छ ; तीमध्ये त्यहाँ एउटा तरबार छ। त्यो तरवार निकै पहिलेदेखि रहँदै आएको विश्वास गरिन्छ ।
भीरकोट बडामौलाकालिका मन्दिरमा गरिने यस प्रकारका सम्पूर्ण पूजाविधिहरू यसअन्तर्गत मौजामा रहेका मौलाकालिकाका मन्दिरहरूमा पनि गरिन्छ । भीरकोटे राजाका पालादेखि गरिदै आएको पूजा अद्यपि जस्ताको तस्तै तरिकाबाट सञ्चालन हुँदै आएको छ ।
