जन आस्थाको समाचार झुट र भ्रमको पुलिन्दा:फेदीखोला गाउँपालिका
माघ २४, २०७८
फेदीखोला , २४ माघ २०७८
स्याङ्जाको फेदिखोला गाउँपालिकाले जनआस्था साप्ताहिकमा माघ २२ गते प्रकाशित समाचार प्रती गम्भीर ध्यानाकर्षण भएको जनाएको छ। ‘फेदीखोलाका अध्यक्षले भालूपहाड पनि छाडेनन्’ शिर्षकको समाचारप्रति पालिकाको ध्यानाकर्षण भएको हो ।पत्रकारिताको मूल मर्म विपरीत आरोपित पक्षको भर्सन समेत नलिई समाचार प्रकाशित गरिएको भन्दै एक विज्ञप्ति प्रकाशन गरी पालिकाले उक्त समाचार झुट र भ्रमको पुलिन्दा भएको प्रष्ट पारेको छ।
गाउँपालिका अध्यक्ष घनश्याम सुवेदीद्वारा हस्ताक्षरित विज्ञप्तीमा भनिएको छ , “गाउँपालिकाको महत्वाकांक्षी योजनाको रुपमा रहेको भालुपहाड पर्यटकीय पुर्वाधारको काम क्रमागत रुपमा संचालन भइरहेको र अध्ययन प्रतिवेदन तयारी लगायत गाउँपालिकाबाट भएका सबै खरिदका कार्यहरु सार्वजनिक खरिद ऐन २०६३ र सार्वजनिक खरिद नियमावली २०६४ अनुरुप भएका छन् ।
पालिकाले भालु पहाडलाई आधुनिक पार्क सहितको पर्यटकिय गन्तव्य स्थल बनाउन डिपिआर सहित क्रमागत पूर्वाधारको कार्यक्रम शुरु गरेको छ । तर पुतलीबजार नगरपालिका र फेदीखोला गाउँपालिकाको सिमा विवादको कारण योजना अनुरुप अघि बढ्न सकेन । यही विषयलाई लिएर मेरो तस्बिर सहित समाचार प्रकाशित गरिनु मेरो चरित्र हत्याको प्रयास हो ।”
यसैगरी गलेम सड्केटारी बाटोको बजेट दुरुपयोग भएको विषयमा गम्भीर ध्यानाकर्षण भएको जनाउँदै पालिकाले उक्त सडक खण्डको बजेट गाउँपालिकाले खर्च गर्ने गरि मुख्य मन्त्रीको कार्यालयबाट कुनै अख्तियारी प्राप्त नभएको जनाइएको छ।
विज्ञप्तिमा भनिएको छ, “गाउँपालिकाको कार्यसम्पादनको विषयमा सूचना लिन खोज्ने जो कोहीलाई सूचना अधिकारीमार्फत माग भएको सुचनाहरु नियमित प्रदान गरिएको छ। सुचना, तथ्याङ्क विना कुनै व्यक्तिगत तथा समुहगत फाइदाको लागि नियोजित रुपमा फैलाइएको भ्रमले उक्त सञ्चारमाध्यमको चरित्र उदांगो पारेको छ ।”
स्थानीय तहको निर्वाचन सम्पन्न भएसँगै फेदीखोला गाउँपालिकाले जिल्लामा मात्र नभई गण्डकी प्रदेशमानै नमुना कार्यक्रमहरु अघि सारेको स्थानीयको भनाई छ । मजदुरहरुको पारिवारीक सुरक्षाको लागि मजदुर संचीत कोष यहाँको लोकप्रिय कार्यक्रम बनेको थियो । प्रत्येक मजदुरलाई पालिकाले ज्याला तोक्ने र तोकिएको ज्यालाको १५ प्रतिशत रकम मजदुरको खातामा राखिदीने कार्यक्रमले मजदुरका परिवारलाई सुरक्षित बनाएको छ ।
यस्तै उत्पादनमा आधारित कृषिमा अनुदान, उत्पादीत बस्तुको न्यूनतम समर्थन मुल्य, कृषि उपज खरिद गर्न कृषि एम्बुलेन्स र बाँझो जग्गा खेतबारी उपभोग कार्यक्रमले यहाँका कृषकहरु निकै उत्साहित बनेका छन् ।
शिक्षाको क्षेत्रमा अध्यक्ष आँफैले आफ्ना छोरा छोरीलाई सामुदायिक विद्यालयमा पढाउन पठाएसँगै यहाँका अभिभावक सामुदयिक विद्यालय प्रति आकर्षित भएका छन् । विद्यार्थीको समस्यमा बुझ्न अध्यक्ष आँफै विद्यालय पुग्दा सामुदायिक विद्यालयको शैक्षिक गुणस्तर उकासिएको छ । पालिकाले ४० प्रतिशत बजेट नै शैक्षिक गुणस्तर सुधार्नको लागि विनियोजन गरेर कार्यक्रम अघि सारेको छ ।
कुनै समूह वा दल विशेषको कुण्ठा एवं मिथ्थाङकको आडमा सिंगो गाउँपालिकालाई बद्नियत गराउने उद्देश्यले प्रेसित कपोलकल्पित समाचारलाई विश्वास नगर्न तथा सत्य तथ्य जानकारीको लागि पालिकामा सम्पर्क गर्न समेत पालिकाले अनुरोध गरेको छ।
