राष्ट्रिय लोक तथा दोहोरी प्रतिष्ठान स्याङ्जाको अध्यक्षमा खड्का निर्वाचित
मङि्सर २९, २०७९
स्मार्ट संवाददाता ,वालिङ
२९ मंसिर २०७९
राष्ट्रिय लोक तथा दोहोरी प्रतिष्ठान नेपाल स्याङ्जाको बुधबार सम्पन्न आठौं जिल्ला अधिवेशनबाट अध्यक्षमा नेत्र खड्का निर्वाचित भएका छन् । स्याङ्जाको वालिङमा सम्पन्न प्रतिष्ठानको आठौं अधिवेशनले खड्कालाई सर्वसम्मत अध्यक्षमा चयन गरेको हो । “हाम्रो अभियान अग्रजलाई सम्मान, नव प्रतिभालाई प्रोत्साहन” भन्ने नाराका साथ आयोजित प्रतिष्ठानको आठौं जिल्ला अधिवेशन तथा २१ औं वार्षिक साधारणसभा वालिङमा सम्पन्न भएको हो ।
यसैगरी प्रतिष्ठानको प्रथम उपाध्यक्षमा जगत गौंडेल, महिला उपाध्यक्ष तारा पौडेल, द्वितीय उपाध्यक्ष रामप्रसाद तिवारी, सचिव राजेश भण्डारी, सह सचिव गोविन्द चापागाईं, कोषाध्यक्ष कमला गैह्रे र सह कोषाध्यक्षमा रविना गुरुङ चयन भएका छन् । अधिवेशनले आगामी ३ वर्षे कार्यकालका लागि अरु २ जना पछि थप गर्नेगरी २३ सदस्यीय नयाँ कार्य समिति सर्वसम्मत गठन गरेको छ ।
