हामीले पूर्वाधार विकास र कृषिलाई प्राथमिकतामा राखेर काम गरेका छौं।
बैशाख ०१, २०७९
राजनीतिक दलहरू स्थानीय निकायको निर्वाचनमा आफ्नो पार्टीको तर्फबाट उम्मेदवार टुङ्ग्याउने क्रममा छ्न्। चुनावको प्रचारप्रसार गर्न र गाउँ र नगरमा चुनावी माहोल सृजना गर्न दलहरू व्यस्त छ्न्। केन्द्रदेखि स्थानीय तहका नेता कार्यकर्ताहरू आफ्नो सरकार र पार्टीले गरेका राम्रा कामका विषयमा केन्द्रित रहेर जनमत आफ्नो पोल्टामा पार्न लागिपरेका छ्न्। यसै सन्दर्भमा स्याङ्जा जिल्लाको अर्जुनचौपारी पालिकाको पाँच वर्षका उपलब्धि,अवसर र चुनौतीमा केन्द्रीत रहेर हामीले वर्तमान गाउँपालिका अध्यक्ष एवं अबको स्थानीय निर्वाचनमा नेपाली काङ्ग्रेसको तर्फबाट गाउँपालिका अध्यक्ष पदका एक मुख्य दाबेदार दीर्घ नारायण अर्यालसँग कुराकानी गरेका छौं। प्रस्तुत छ स्मार्ट अखबारका प्रधान सम्पादक नारायण प्रसाद कोइरालाले पालिका अध्यक्ष अर्यालसँग गरेको कुराकानीको सम्पादित अंश:
१. हजुरको कार्यकाल लगभग सकियो। अर्जुनचौपारी गाउँपालिकाको प्रमुख भएर गरेका कामहरुप्रति कतिको सन्तुष्ट हुनुहुन्छ ?
पाँच वर्षको अवधिमा मैले गरेका कामहरुको स्वः मूल्यांकन गर्दा पूर्ण रुपमा सन्तुष्ट छु । किनभने मैले सबै राजनीतिक चुनौतीहरुलाई सामना गर्दै पालिकाको पूर्वाधारहरुको विकासको नयाँ आधारहरु सृजना गरेको छु । मेरो ठाउँमा अरु कोही व्यक्ति निर्वाचित भएको भए मैले गरेजति गर्न सक्ने थिएन, यो कुरामा मलाई घमण्ड पनि छ ।
२. हजुरले पाँच वर्षको कार्यकालमा गरेका मूख्य पाँच कामहरु के के हुन् ?
पाँच वर्षको अवधिमा हामीले दर्जनौं विकास निर्माणका कामहरु गरेका छौं । किन ५ वटा काममै सिमित गर्न खोज्नुभएको ? हामीले पूर्वाधार विकास र कृषिलाई प्राथमिकतामा राखेर काम गरेका छौं।हामीले करीब ३०० रोपनी व्यक्तिले भोग चलन गरेको सरकारी जग्गा पालिकाकै नाममा ल्याएका छौं । सरकारी जग्गालाई नै पालिकाको नाममा ल्याएर ३० रोपनी जग्गामा पालिकाको प्रशासकीय भवन निर्माण गरिरहेका छौं, सम्पन्न हुने चरणमा छ । १०० रोपनी जग्गामा औधोगिक ग्राम निर्माण गरेका छौं । औधोगिक ग्राममा विद्युतीकरणको काम अन्तिम चरणमा पुगेको छ । मुख्य मुख्य १२ सडकहरुको डि.पि.आर. निर्माण भएको छ । ५२ वटा खानेपानी योजनाहरुको डि.पि.आर. नि भएको छ । ६ वटै वडामा गरेर ५२ वटा खानेपानी योजनाहरूको डि.पि.आर निर्माण भएको छ। पालिकास्तरीय पहिलो पञ्चवर्षीय योजना निर्माण भएको छ । पालिकाको वृत चित्र निर्माण भएको छ । केवरेखोला र सहरेखोलामा मोटरेवल पुल निर्माण सम्पन्न हुँदैछन् । फोहोरमैला प्रशोधन केन्द्र निर्माण भएको छ । वडा नं. २, ३ र ५ का वडा कार्यालय भवन निर्माण भएका छन् । धार्मीक तथा पर्यटकीय क्षेत्रहरुको वृत्तचित्र र गुरु योजना निर्माण गरेका छौं । ३० रोपनी जग्गामा पालिकास्तरीय खेलमैदान निर्माण भएको छ । पालिकाभित्र ADSL फोन सेवा र World-link Internet सेवा जडान एवम् विस्तार भएको छ । स्थानीय सरकार संचालनमा आवश्यक पर्ने शिक्षा, सहकारी, स्वास्थ्य, सडक, आर्थिक राजस्व, कृषि ऐन सहित करीब ४ दर्जन ऐन, नियम र कार्यविधिहरु निर्माण भएका छन् । स्थानीय शिक्षाविद्हरुको सहयोगमा स्थानीय पाठ्यक्रम निर्माण भैरहेको छ ।
३. २०७४ सालको स्थानीय निर्वाचनमा हजुरले तयार पारेको घोषणा पत्र र आश्वासनका आधारमा हेर्दा कति प्रतिशत काम सम्पन्न भएका छन् ?
घोषणापत्रमा जे जति काम उल्लेख गरिएका थिए र जे जति आश्वासन बाँडिएको थियो, त्यी मध्ये अधिकांश काम सम्पन्न भएका छन् । केही सम्पन्न हुने चरणमा छन् र केहीको सुरुवात भएको छ । मेरो विचारमा हामीले करीब करीब शतप्रतिशत काम गर्न सफल भएका छौं ।
४. शतप्रतिशत सफलता हाँसिल गरेको भन्नुभयो तर अर्जुनचौपारी आउने मुख्य पहुँचमार्ग हेलु- अर्जुनचौपारी सडक अझै सम्पन्न हुन सकेको छैन । अझै हिलाम्मे र धुलाम्मे छ । किन पूरा भएन ? पालिकाको पहुँच र निगरानी नपुगेकै हो ?
यो सडक खण्डमा प्रदेश सरकारको लगानीमा कालोपत्रे गर्ने गरी काम भईरहेको छ, पालिकाको कमजोरी होइन । जनप्रतिनिधिको रुपमा हामीले पटकपटक खबरदारी र दबाब दिएका छौं । ताकेता गरेका छौं । यो ठेकेदारको लापरबाहीले नै समयमा सम्पन्न हुन नसकेको हो । यो पालिकाको इज्जत र प्रतिष्ठाको विषय भएको हुनाले मैले हरेक हप्ता ताकेता गरिरहेकै छु । बैशाख भित्र काम सम्पन्न हुने गरी काम भइरहेको ठेकेदार कम्पनीले भनेको छ ।
५. जनताले अनुभूति गर्ने गरी पालिकाले पाँच वर्षमा गरेका कामहरु के के हुन् ?
हामीले पालिकाभित्र १९ वटा नयाँ सडक निर्माण गरेका छौं भने ७ वटा सडकहरुको स्तरोन्नती गरेका छौं । ४ वटा सार्वजनिक शौचालय र १५ वटा सामुदायिक भवन निर्माण गरेका छौं । सडक विकास पूर्वाधारको पनि पूर्वाधार भएको हुनाले प्राथमिकतामा राखेर काम गरेका छौं । रोजगारी सृजना र आय आर्जन वृद्धिका लागि कृषिमा उत्पादन, उत्पादकत्व र योजनाका आधारमा ५० प्रतिशत अनुदान र ऋणमा दश लाख रकम सम्म १०० प्रतिशत सम्म व्याज अनुदान दिएका छौं । पशु बीमा कार्यक्रममा कृषकले बेहोर्नुपर्ने २५ प्रतिशत रकम पनि पालिकाले नै तिरिदिएको छ । सुन्तला पकेट क्षेत्र विकासका लागि बिरूवा र रोपणमा समेत ५० प्रतिशत अनुदान दिएका छौं । बाख्रापालन, तरकारी खेती र मौरी पालनमा पनि ५० प्रतिशत नै अनुदान छ । हामी मासुमा आत्मनिर्भर बनेका छौं । सिंचाईको लागि पक्की कुलो निर्माण भएका छन् । दुग्धजन्य उत्पादनमा अग्रसर किसानलाई पनि ५० प्रतिशत अनुदान दिएका छौं । भैंसीका पाडापाडी हुर्काउनेलाई प्रतिगोटा रु. २००० का दरले सहयोग प्रदान गरेका छौं । आमा समूह र क्लवका भवन निर्माण गरिएको छ । विद्युतीकरणमा प्रयोग भएका जीर्ण अवस्थामा रहेका काठका पोलहरू प्रतिस्थापन गरी फलामका पोलहरु राखेका छौं । कृषकहरुलाई ५० प्रतिशत अनुदानमा हाते ट्याक्टर, कम्बाइन मिल र थ्रेसर प्रदान गरेका छौं । सिँचाइमा ८५ प्रतिशत सम्म अनुदान दिएका छौं ।
६. पर्यटनको विकासमा के कति काम गर्नुभएको छ ?
विविध कारणवश यस क्षेत्रमा अपेक्षित काम गर्न सकिएको छैन । होमस्टे निर्माण र पर्यटकीय क्षेत्रमा पूर्वाधार विकास, प्रचार प्रसार र वृतचित्र बनाउने काम गरेका छौं । डहरेदेउराली क्षेत्रमा पूर्वाधार निर्माण भएको छ । थाप्लेमा पनि पूर्वाधार निर्माण र प्रचार प्रसारको काम भएको छ । धार्मिक तथा पर्यटकीय क्षेत्रको क्रमिक र व्यवस्थित विकासका लागि गुरुयोजना निर्माण गरेका छौं ।
७. पार्टीभित्र आकांक्षीहरु पनि होलान् । कार्यकाल दोहोर्याएर अपूरा काम पूरा गर्ने सोचमा हुनुहुन्छ ? की नयाँलाई अवसर दिनुपर्छ भन्ने सोचाई छ ?
निर्वाचनमा आधा दर्जन जती आकांक्षीहरु हुनुहुन्छ । विकास र जनताका लागि राजनीति गर्ने भएकाले हाम्रो पार्टीबाट जो आएपनि सुरु गरिएका योजना पूरा हुन्छन् । आकांक्षीको सूचीमा मेरो नाम पनि छ तर म नयाँ साथीहरुलाई साथ, सहयोग र समर्थन गर्ने पक्षमा छु ।
८. अन्त्यमा स्मार्ट अखबार मार्फत पालिकाबासीलाई के भन्न चाहनुहुन्छ ?
सिमित स्रोत र साधनका बाबजुद असीमित आवश्यकता पूरा गर्नुपर्ने बाध्यताका कारण सडक र खानेपानीका क्षेत्रमा अपेक्षित काम गर्न नसक्दा पनि विकास निर्माणका काममा व्यापक जनसहभागिता जुटाइ पालिकाको विकासमा सहयोग पुर्याउनुभएकोमा सम्पूर्ण पालिकाबासीलाई धन्यवाद व्यक्त गर्न चाहन्छु।हामी स्थानीय निर्वाचनको संघारमा छौँ । पालिकाको बृहत्तर विकास गर्न र अधुरा विकास निर्माणका योजनाहरू यथासक्य चाँडो सम्पन्न गर्न योग्य, सक्षम र दुरदर्शी उम्मेदवारलाई मतदान गर्न अनुरोध गर्न चाहन्छु।
