वालिङमा एमालेको तर्फबाट मेयर र उपमेयर सर्वसम्मत सिफारिस
बैशाख ०४, २०७९
गोपाल जि.टी.
४ वैशाख २०७८, वालिङ
वैशाख ३० मा हुने स्थानीय निर्वाचनका लागि विभिन्न पालिकाहरुमा उम्मेद्वार चयनमा रस्साकस्सी परिरहेका बेला स्याङ्जाको वालिङ नगरपालिकामा नेकपा एमालेले सर्वसम्मत सिफारिस गरेको छ । वालिङ नगरपालिकाको प्रमुख र उप प्रमुखका पदका लागि नेकपा एमाले वालिङले आइतबार सर्वसम्मत उम्मेदवार टुंगो लगाएको हो ।
एमाले वालिङ नगर कमिटीको आइतबार बसेको बैठकले नगर प्रमुखमा कृष्ण खाँण र उप प्रमुखमा खगिसरा थापालाई उम्मेद्वार बनाउने निर्णय गरेको हो ।नगर प्रमुखका उम्मेद्वार खाँण नेपालको राजनीतिक परिवर्तनमा विद्यार्थी जीवनदेखि नै लाग्नुभएका व्यक्तित्व हुनुहुन्छ।उहाँ वामपन्थी नेतृत्वमा परिचित व्यक्ति हुनुका साथै आम नागरिकहरुमा लोकप्रिय नेताका रुपमा चिनिनुहुन्छ।
यसैगरी उप प्रमुखका उम्मेद्वार थापा २०७४ को स्थानीय निर्वाचनमा वालिङ नगरपालिकामा झिनो मतले पराजित नेतृ हुनुहुन्छ। मेयर र उपमेयरको नाम सर्वसम्मत गरिएको नगर कमिटी अध्यक्ष शोभाकान्त पौडेलले जानकारी दिनुभयो। मेयरको उम्मेद्वारमा सिफारिस हुनुभएका खाँण एमालेको स्याङ्जा जिल्ला कमिटीका उपाध्यक्ष हुनुहुन्छ भने उपमेयरको उम्मेद्वार थापा जिल्ला कमिटी सचिवालय सदस्य हुनुहुन्छ । मेयरको दाबी गरेका नगर अध्यक्ष शोभाकान्त पौडेल र सचिव यामकान्त खनाल पछि हटेपछि खाँणको उम्मेदवारी सर्वसम्मत भएको हो ।
