भीरकोटका व्यवसायीलाई कर शिक्षा एवं वित्तीय साक्षरता
पुष १३, २०८०
भीरकोटका व्यवसायीहरूलाई कर शिक्षा र वित्तीय साक्षरता प्रदान गरिएको छ। भीरकोट उद्योग वाणिज्य संघको आयोजनामा करदाता सेवा कार्यालय स्याङ्जा र गरिमा विकास बैंक सँगको सहकार्यमा कर शिक्षा एवं वित्तीय साक्षरता कार्यक्रम संचालन गरिएको उद्योग वाणिज्य संघका वरिष्ठ उपाध्यक्ष नुवादत्त अर्यालले जानकारी दिए। कार्यक्रममा भीरकोट नगरपालिकाका उद्योगी, व्यवसायी, विद्यालयका लेखापालहरूलाई वित्तीय साक्षरता र कर शिक्षा प्रदान गरिएको हो।
करदाता सेवा कार्यालय पुतलीबजारका कर अधिकृत विजय भुसालले सहभागीहरूलाई कर शिक्षा प्रदान गरेका थिए। उनले विद्यमान कर प्रणाली, करको दायरा, कानुनी जटीलताका विषयमा प्रष्ट पार्दै सहभागिका जिज्ञासाहरूको समाधान गरेका थिए। कर राष्ट्र निर्माणको आधार भएको बताउँदै उनले व्यवसायीलाई समयमा कर तिर्न र बेलाबखत आइपर्ने कर सम्बन्धि समस्याको समाधान गर्न कर कार्यालय प्रतिबद्ध रहेको प्रष्ट पारेका थिए।शुक्रबार पालिकामा कर सहायता कक्ष समेत स्थापना गरिएको कर अधिकृत भुसालले जानकारी दिए।
वित्तीय साक्षरता कार्यक्रममा बैंकका प्रमुख कार्यकारी अधिकृत गोविन्द प्रसाद ढकाल, क्षेत्रीय प्रमुख लेखनाथ भट्टराई, बयरघारी शाखा प्रमुख अर्विन अर्याल र बयरघारी शाखामा कार्यरत कर्मचारीहरूको उपस्थिति रहेको थियो।
