एसईई परीक्षामा उत्तिर्ण विद्यार्थीहरू सम्मानित
साउन २१, २०७९
स्मार्ट अखबार संवाददाता
२० साउन २०७९
एसईई परीक्षामा उत्तिर्ण विद्यार्थीहरू सम्मानित भएका छ्न्। विद्यार्थीहरूको मनोबल बढाउने उद्देश्यले २०७८ सालको एसईई परीक्षामा उत्कृष्ट नतिजा ल्याएका विद्यार्थीहरूलाई अनेरास्ववियु स्याङ्जाले सम्मान गरेको हो।
जिल्लाको वालिङ नगरपालिकामा एक कार्यक्रम आयोजना गरेर एसईई उत्तीर्ण विद्यार्थीहरुलाई उज्ज्वल शैक्षिक भविष्यको कामना गर्दै सम्मान गरिएको हो।
नेकपा एमाले केन्द्रीय सचिव तथा पूर्वमन्त्री माननीय पद्मा अर्यालको प्रमुख आतिथ्यता तथा नेकपा एमाले प्रदेश कमिटी सदस्य डाक्टर बुद्धिमान श्रेष्ठको विशिष्ट आतिथ्यतामा आयोजना गरिएको उक्त सम्मान कार्यक्रममा नेकपा एमाले स्याङ्जा जिल्ला सचिव राजेन्द्र डुम्रे, नेकपा एमाले भीरकोट अध्यक्ष तथा अनेरास्ववियु स्याङ्जाका पूर्व अध्यक्ष विश्वनाथ अर्याल, अनेरास्ववियु केन्द्रीय सचिव खेम मरासिनी, केन्द्रीय सदस्य तथा गण्डकी प्रदेश सचिव आरके पोखरेल, अनेरास्ववियु केन्द्रीय सचिवालय सदस्य रिता ढकाल, ज्ञानु भुजेल लगायतले सम्पूर्ण विद्यार्थीको उज्वल भविष्यको कामना गर्दै शुभकामना व्यक्त गर्नुभएको थियो।
” आजका विद्यार्थी भोलिको सम्वृद्ध राज्य निर्माणका आधार हुन्। विद्यार्थीहरूले असल चरित्र निर्माण र सामाजिक जीवनको विकास कुरामा जोड दिनु आवश्यक छ।” नेकपा एमालेका केन्द्रीय सचिव अर्यालले भन्नुभयो।
अनेरास्ववियु स्याङ्जाका अध्यक्ष सगुन रानाको अध्यक्षतामा आयोजित उक्त सम्मान कार्यक्रमको सञ्चालन अनेरास्ववियु स्याङ्जाका सचिव नविन पौडेलले गर्नुभएको थियो। उक्त सम्मान कार्यक्रममा स्याङ्जा जिल्लाभरका सामुदायिक तथा संस्थागत विद्यालयबाट २०७८ सालको एसईई परीक्षा उत्तीर्ण गरेका करिब ५०० जना विद्यार्थीहरूको सहभागिता थियो।
