५०० कुकुरहरूलाई लगाइयो रेविज विरूद्धको खोप
असोज १९, २०७८
आश्विन १९, भीरकोट खबर डेस्क,
सप्ताहव्यापी रूपमा चलेको रेविज विरूद्धको निशुल्क खोप अभियानमा भीरकोटमा ५०० वटा कुकुरहरूलाई रेविज विरूद्धको खोप लगाइएको छ।भीरकोट नगरपालिका पशु सेवा शाखाको आयोजनामा भेटेरिनरी अस्पताल तथा पशु सेवा विज्ञ केन्द्र स्याङ्जाको सहकार्यमा “रेबिज तथ्य बुझौं, त्रसित नहोऔं” भन्ने नाराका साथ असोज १२ गते सुरू भएको खोप अभियान १८ गते सकिएको हो।
रेबिज विरुद्ध खोपको आविष्कार गर्ने फ्रान्सेली वैज्ञानिक लुइस पाश्चरको निधन भएको दिन सेप्टेम्बर २८ मा उहाँको योगदानलाई स्मरण गर्दै हरेक वर्ष रेबिज दिवस मनाइन्छ। सप्ताहब्यापी कार्यक्रमको दौरानमा २००वटा सामुदायिक कुकुर सहित ५०० वटा कुकुरहरूलाई रेबिज बिरूद्धको खोप दिइएको पशु सेवा कार्यालय भीरकोटका नायब पशु स्वास्थ्य प्राविधिक चण्डी गैह्रेले जानकारी दिनुभयो। रेबिज एकदमै घातक रोग भएकाले घरभित्रका वा बाहिरका कुकुर बिरालोलाई रेबिज विरुद्धको खोप लगाई आफ्नो परिवार र समाजलाई सुरक्षित राख्न पशु सेवा कार्यालयले अनुरोध गरेको छ।रोग लागिसकेपछि यसको उपचार एकदमै जटिल हुने तथा बिरामी बच्ने संभावना पनि न्यून हुने हुँदा पूर्व सावधानी स्वरुप सबै घरपालुवा तथा सामुदायिक कुकुरहरूलाई खोप लगाइएको पशु सेवा कार्यालय भीरकोटका प्रमुख पशु सेवा अधिकृत कमलकान्त पौडेलले जानकारी दिनुभयो।
