बेमौसमी वर्षाले पकानको धान बालीमा क्षति
कार्तिक ०२, २०७८
कार्तिक २, प्रकाश अर्याल,
धान काट्ने बेलामा परेको बेमौसमी वर्षाका कारणले भीरकोटकै सबैभन्दा ठूलो उर्वर फाँट पकानको धान बालीमा ठूलो क्षति पुगेको छ । हावा र पानीका कारण धान ढलेको छ । खेतमा काटेर सुकाउन राखेका धानका पाँजा भिजेका छ्न् । काट्न बाँकी रहेको धान पनि खेतमै झरेको छ । धान भित्र्याउने बेलामा भएको क्षतिका कारण धान उत्पादनमा पनि नकारात्मक प्रभाव पर्ने निश्चित भएको छ । अधिकांश कृषकले नगरपालिकाले ५०% अनुदानमा वितरण गरेको सावित्री, मंसुली, रामधान, हाइब्रेड र मकवानपुर जातको धानको बीउ रोपेका थिए । 
“धान पनि फल्ने र पराल पनि हुने भनेर मंसुली जातको धान लगाएको पसाउने बेलामा हावाहुरी आयो र खेतको धान सबै ढलायो, पसाउने बेलामा धान ढलेपछी धान होइन भुस (टटहलो) मात्रै हुन्छ, अब धान पाकेर काट्ने बेलामा पानी परेर रुझायो धान काटेको दिन देखि निरन्तर पानी परेको पर्यै छ र धान खेतमै झर्ने अवस्था आउन लाग्यो, सोंचेजस्तो धान अहिले भएन” भन्नुहुन्छ पकानका कृषक शोभाकान्त तिवारी ।
धान पाकेर पहेंलपुर छ काटेको धान पानीले जलाम्य छ, धान भुँइमै झर्ने अवस्था आएको छ । यो भित्र्याउने बेलामा त पानी नआए पनि हुन्थ्यो नि ! आनन्दसंग भित्र्याउन पाए पनि त हुन्थ्यो । कति साह्रो दुख दिएको कहिले खपटे किराले सेताम्मे बनाउछ कहिले पानीले डुबाउछ” पकानका अर्का कृषक मित्रलाल कुँवर दुखेसो गर्नुहुन्छ ।
पकानको कहिनेको खेतीयोग्य जमिन आँधीखोलाले बगाउँदा समेत स्थानीय निकाय मौन छ । खोलाले खेत त बगायो बगायो आंँधिखोला करिडोर अन्तर्गतको बाटो समेत खसेर बगाउन लाग्दा पनि तटबन्धनका लागि चासो राखेको छैन । आलु तथा धान उत्पादनको मुख्य पकेट क्षेत्र पकान फाँट वर्षा याममा समेत डुबानको चपेटामा पर्ने गरेको छ । आँधीखोला पारी ड्याम बनाउँदा खोला वारीको उर्वर भूमी पकानलाई भने वेवास्ता गरिएको छ ।
