स्याङ्जामा ११ स्थानीय तहका प्रमुखमा ६७ र उपप्रमुखमा ४९ जनाको उम्मेदवारी
बैशाख १३, २०७९
कला राना ,२०७९ वैशाख १३ गते
स्याङ्जा ।
स्थानीय तहको निर्वाचनका लागि स्याङ्जामा प्रमुख पद पालिका प्रमुखमा ६७ जना र उपप्रमुख पदका लागी ४९ जनाले उम्मेदवारी दिएका छन् । ११ स्थानीय तह रहेको स्याङ्जामा नेपाली काँग्रेस, नेकपा एमाले, नेकपा माओवादी केन्द्र, नेकपा समाजवादी, राप्रपा, राजमो, मङ्गोल नेशनल अर्गनाईजेसन, जरोकिलोलगायतका पार्टी सहित केही स्वतन्त्र व्यक्तिहरूले समेत उम्मेदवारी दिएका हुन् । ११ प्रमुख तथा उपप्रमुख पदका लागी ११६ जनाको उम्मेदवारी परेको मुख्य निर्वाचन अधिकृत वसन्तराज पौडेलले जानकारी दिनुभयो ।
यस पटकको निर्वाचनमा यहाँका पालिका प्रमुखमा यसअघि जितेका उम्मेदवार समेत दोहोरिएका छन् । वालिङ नगरपालिकाका दिलिपप्रताप खांण, पुतलीबजार नगरपालिकाका सीमाकुमारी क्षेत्री र महेश पुरी, कालीगण्डकी गाउँपालिकाका खिम थापा र सावित्रा कोइराला, फेँदिखोलाका घनश्याम सुवेदी, हरिनासका खिमनारायण मानन्धरले यस पटक समेत उम्मेदवारी दिनुभएको छ ।
यसअघि २०७४ सालको स्थानीय निर्वाचनबाट नेपाली काङ्ग्रेसबाट वालिङका खांण, नेकपा एमालेबाट पुतली बजारका क्षेत्री र पुरी, हरिनासबाट मानन्धर, फेँदिखोलाबाट सुवेदी, काली गण्डकीबाट थापा र कोइरालाले चुनाव जितेर एक कार्यकाल सम्हालिसक्नुभएको छ । यस पटक पनि उहाँहरूले यसअघिकै पदमा उम्मेदवारी दिनुभएको छ ।
जिल्लाकै मध्यभागमा रहेको वालिङमा मेयरका लागि ८ जनाले उम्मेदवारी दिनुभएको छ । उम्मेदवारी ८ जनाको रहेपनि यहाँ मुख्य प्रतिस्पर्धा नेकपा एमालेबाट कृष्ण खांण र काङ्ग्रेसबाट दिलीप खांणकै बीच हुने देखिएको छ । जिल्लाको मध्यभागमा रहेको वालिङमा यसअघि काङ्ग्रेसले जितेको थियो । आफ्नो जितलाई अडिक राख्न काङ्ग्रेसको प्रयास उत्तिकै छ भने एमालेले यसअगाडिको हारको बदला लिने दाउमा छ ।
त्यस्तै पुतलीबजार नगरपालिकामा मेयरका लागी ९ जना र उपमेयरका लागी ७ जनाले उम्मेदवारी दिएका छन् भने भीरकोटमा मेयरका लागी ६ जना र उपमेयरका लागी ५ जनाको उम्मेदवारी परेको छ । त्यस्तै चापाकोटमा मेयरका लागी ६ जना र उपमेयरका लागी ५ जनाको उम्मेदवारी परेको छ भने गल्याङमा मेयरका लागी ९ जना र उपमेयरका लागी ६ जनाको उम्मेदवारी परेको छ ।
६ गाउँपालिकातर्फ अर्जुनचौपारीमा ५ जनाले अध्यक्षका लागि ४ जनाले उपाध्यक्षका लागी उम्मेदवारी दिएको निर्वाचन अधिकृतको कार्यालय अर्जुनचौपारीले जनाएको छ । त्यस्तै आँधीखोलामा अध्यक्षका लागी ६ जना उपाध्यक्षका लागी ४ जना, फेँदिखोलामा अध्यक्षका लागी ५ जना उपाध्यक्षका लागी ४ जना, बिरुवामा अध्यक्षका लागी ४ जना उपाध्यक्षका लागी ५ जना, हरिनासमा अध्यक्षको लागी ४ जना उपाध्यक्षको लागी २ जना, कालीगण्डकीमा अध्यक्षको लागी ५ जना र उपाध्यक्षको लागी २ जनाले उम्मेदवारी दिएका मुख्य निर्वाचन अधिकृतको कार्यालय स्याङ्जाले जनाएको छ ।
