भीरकोटमा नौलो प्रयास : घरघरमै सुत्केरी पोषण एवं परामर्श सेवा
स्मार्ट संवाददाता, भीरकोट
२५ साउन २०८०
फरकफरक जनमुखी काम गरेर चर्चामा आइरहने भीरकोट नगरपालिका वडा नं ८ का जनप्रतिनिधिहरूले आ.व. २०८०/८१ मा नौलो कार्यक्रम सुरू गरेका छन्। “सुत्केरीलाई पोषण र परामर्श सेवा” नाम दिइएको यो कार्यक्रम अन्तर्गत वडाका जनप्रतिनिधि , स्वास्थ्य चौकीका अनमी र प्रमुख, आमा समुहका प्रतिनिधि सुत्केरी आमाको घरमै पुगेर कुखुराको भाले र न्यानो कपडा प्रदान गर्ने गर्दछन्। घरदैलोमै पुग्ने स्वास्थकर्मीले आमा र बच्चाको स्वास्थ्य अवस्थाको बारेमा जानकारी लिइ आवश्यक स्वास्थ्य सेवा र परामर्श दिने गर्दछन् भने जनप्रतिनिधिले सुखदुःख र अन्य समस्याका बारेमा समेत जानकारी लिन्छ्न्।
२ जना सुत्केरी आमाहरूलाई कुखुराको भाले र अन्य पोषण सामाग्री दिएर आजबाट कार्यक्रमको शुभारम्भ गरिएको हो।माझखर्ककि कुसुम खनाल र शालीकोषकी सावित्रा सुनुवारलाई पोषण र परामर्श सेवा दिइएको वडाले जनाएको छ।
“सुत्केरीलाई पोषण र परामर्श सेवा ” कार्यक्रम कार्यान्वयन गर्न वडाले १ लाख रूपैयाँ बजेट छुट्याएको वडा अध्यक्ष नन्दलाल खनालले स्मार्ट अखबारलाई जानकारी दिए।फिल्डमा सँगै खटिने वडा सचिवले जन्मदर्ताका लागि आवश्यक पर्ने कागजात जुटाउने र ३५ दिन भित्रै जन्मदर्ता गर्नुपर्ने विषय आमाबाबुलाई बुझाउने गर्दछ्न्। सरोकारवाला सबैको सहकार्य रहने यो कार्यक्रम बालमैत्री भीरकोट अभियानलाई सार्थकता दिन अगाडि सारिएको वडा अध्यक्ष खनालले जानकारी दिए।
वडामा औषत रूपमा ३५ जना महिला सुत्केरी हुने गरेको वडा कार्यालय र स्वास्थ्य संस्थाको तथ्यांकले देखाएको छ। बजेटले अधिकतम ५० जना सम्मलाई पोषण सुविधा दिनसकिने वडा अध्यक्षको दाबी छ। स्मरण रहोस् भीरकोट नगरपालिकाले प्रोटोकल अनुसार नियमित रूपमा स्वास्थ्य संस्थामा गर्भपरीक्षण गराउने , स्वास्थ्य संस्थामै बच्चा जन्माउने र ३५ दिनभित्रै जन्मदर्ता गराउने आमाहरूलाई पोषण बापत नगद ५ हजार रूपैयाँ बैंक खातमार्फत दिंदै आएको छ। गत आ.व. २०७९/८० मा मात्रै १ सय ९४ जना सुत्केरी आमाहरूलाई पोषण भत्ता वापतको सुविधा प्रदान गरिएको स्वास्थ्य अधिकृत नारायण बन्धु अर्यालले जानकारी दिए l