शसस्त्र प्रहरीको सहयोग हुँदा थप क्षती भएन: प्रत्यक्षदर्शी
जेठ २७, २०८०
स्मार्ट संवाददाता, भीरकोट
२६ जेठ २०८०
स्याङ्जाको भीरकोटमा भएको आगालागीमा करिब ५१ लाख बराबरको क्षती भएको प्रारम्भिक अनुमान गरिएको छ। भीरकोट नगरपालिका वडा नं १ को विरेन्द्र मार्गमा अवस्थित झरना फोटो स्टुडियोमा शुक्रबार राती करिब ९.२० बजेतिर आगालागी भएको थियो। आगोको ज्वाला यति बेस्सरी दन्कीरहेको थियो कि कोही पनि नजिक जान सक्ने अवस्था थिएन। सोही समय शसस्त्र प्रहरी बल वालिङका डि.एस.पि. राजनलाल श्रेष्ठ सहित पाँच जना प्रहरीहरू जिल्ला सदरमुकाम स्याङ्जाबाट वालिङ फर्कदैं थिए।आगालागीको पूर्वसूचना पाएको टिमले दनदनी आगो बलिरहेको देखेपछि प्रहरीको भ्यान रोक्यो। प्रहरी जवानहरू फायर एक्स्टिङ्गुइसर सहित फिल्डमा उत्रिए र आगो अरू घर सटरमा फैलनबाट जोगाए। पूर्वसूचना पाएकाले आफ्नो जिम्मेवारी निर्वाह गरेको डि.एस. पि. श्रेष्ठले बताए।
स्थानीय दहथुम प्रहरी चौकीका प्रहरी जवानहरू पनि सूचना पाउने बित्तिकै प्रहरी सहायक निरीक्षक निर्मल परियारको कमाण्डमा फिल्डमा उत्रिए। स्थानीय युवाहरूले सहयोगमा आगो नियन्त्रणमा लिन सक्दो सहयोग गर्यो। केही समयमै वालिङबाट दमकल आयो र आगो नियन्त्रणमा आयो।
भीरकोट जेसिजका अध्यक्ष एवं प्रत्यक्षदर्शी सुन्दर कोइरालाले भने, ” आगोका कारण नजिक जान सकिने अवस्था नै थिएन ,आगो तिब्र रूपमा फैलदैं थियो।शसस्त्र प्रहरी बलको सहयोग नपाएको भए करोडौंको क्षती हुन सक्थ्यो।”
स्थानीय व्यवसायी ढाकाराम खनालका अनुसार स्थानीय प्रहरी,एपिएफपको टिम र स्थानीय युवाहरूको सहयोगमा आगो नियन्त्रणमा लिइएको हो।
आगालागीमा परी स्टुडियोका संचालक राजेश पौडेलको दुई तले घरमा ठूलो क्षती पुगेको छ। डि.एस.एल.आर क्यामेरा ५ थान,कम्युटर ४ थान, प्रिन्टर ४ थान,लेमिनेसन मेसिन ३ थान,फोटो फ्रेम, गिफ्ट आइटम, स्टेसनरी सामान , फोटो अम्रेला,र नगद रू ४१ हजार सहित करिब ५१ लाख बराबरको क्षती भएको जिल्ला प्रहरी कार्यालय स्याङ्जाका प्रहरी निरीक्षक पदमराज थापाले जानकारी दिनुभयो।
करिब १५ मिनेट चोकमै अड्कियो दमकल
आगो निभाउन वालिङबाट आएको दमकल अव्यवस्थित सडक संरचनाका कारण करिब १५ मिनेट बिरेन्द्र चोकमै अड्किएको थियो। खानेपानीका लागि निर्माण गरिएको चेम्बरका कारण दमकललाई चोकभित्र छिर्न गाह्रो भएको स्थानीयहरूले बताए। करोडौंको लगानीमा संचालित बयरघारी खानेपानीले कहि कतै पनि हाइड्रेन्ट राखेको छैन। आपतकालीन अवस्थामा आगो निभाउन अत्यावश्यक भएपनि पालिकाको आफ्नो दमकल छैन। वालिङबाट आएको दमकल घटनास्थल आइसकेपछी पनि चोकभित्र छिर्न नसक्नुले आगो पुरै नियन्त्रणमा लिन केही समय लागेको थियो। करिब ११ बजेतिर मात्रै आगो नियन्त्रणमा आएको थियो।
राहत संकलनको तयारी
अग्नीपिडित व्यवसायी पौडललाई राहत प्रदान गर्न भीरकोट उद्योग वाणिज्य संघले उद्योग वाणिज्यका पदाधिकारी र अन्य व्यवसायीसँग स्वेच्छिक रूपमा रकम संकलन गर्ने भएको छ। शनिबार बसेको भीरकोट वाणिज्य संघको बैठकले व्यवसायी पौडेललाई संस्थागत रूपमा समेत सहयोग गर्ने निर्णय गरिएको वरिष्ठ उपाध्यक्ष नुवादत्त अर्यालले जानकारी दिए। राहत तथा सहयोगका लागि अन्य निकायमा पनि उद्योग वाणिज्यले संस्थागत रूपमा सहयोग गर्ने अर्यालको भनाई छ। फोटो व्यवसायीहरूले पनि राहत संकलन गर्ने निर्णय गरेको फोटोग्राफर मञ्च स्याङ्जाका वरिष्ठ उपाध्यक्ष एवं व्यवसायी ढाकाराम खनालले जानकारी दिए।
