प्रहरीसँग समन्वय एवम् सहजीकरणमा अर्जुन चौपारी गण्डकी प्रदेशमा  उत्कृष्ट

कार्तिक ०१, २०८०

नारायणप्रसाद कोइराला, स्याङ्जा

१ कार्तिक २०८०, बिहिबार

स्याङ्जाको अर्जुनचौपारी गाउँपालिका प्रहरीसँग समन्वय एवम् सहजीकरणमा गण्डकी प्रदेशमा उत्कृष्ट भएको छ l  पालिकामा  शान्ति सुव्यवस्था कायम गर्न प्रहरीसँग उत्कृष्ट समन्वय एवम् सहजीकरण गरेकोमा ६८ औं “प्रहरी दिवस” को अवसरमा पालिका पुरस्कृत भएको गाउँपालिकाका उपाध्यक्ष सपना गुरुङले जानकारी दिनुभयो l

६८ औं “ प्रहरी दिवस ” को अवसरमा पोखरामा आयोजित समारोहमा गण्डकी प्रदेशका मुख्य मन्त्री सुरेन्द्र पाण्डेले  गाउँपालिकाका उपाध्यक्ष सपना गुरुङलाई अर्जुन चौपारी गाउँपालिका गण्डकी प्रदेशमा  उत्कृष्ट भएकोमा बधाई एवम् प्रशंसा पत्र प्रदान गर्नुभयो l

गाउँपालिकाका अध्यक्ष प्रकाश तिवारीले पालिकाले प्रहरीलाई सबैखाले राजनीतिक र सामाजिक हस्तक्षेपबाट मुक्त राख्दै स्वतन्त्र रूपले कार्यसम्पादन गर्न सहयोग गर्ने गरेको बताउनुभयो l प्रहरीको मनोबल उच्च राख्न पालिकाले हरसम्भव प्रयास गरेको बताउँदै  उहाँले सुसंस्कृत , सभ्य र समृद्ध अर्जुन  चौपारी निर्माण अभियानमा पालिका लागि परेको जानकारी दिनुभयो l

 

समुदायमा महिला हिंसा, लागू औषध दुर्व्यसनी, ट्राफिक सचेतना  लगायतका जनचेतनामूलक कार्यक्रममा स्थानीय तहका जनप्रतिनिधिहरूले आवश्यक समन्वय र सक्रिय सहभागिता जनाउने गरेको गाउँपालिकाका उपाध्यक्ष गुरुङले जानकारी दिनुभयो l पालिकाको न्यायिक समितिमा पनि प्रहरीको सम्मानजनक उपस्थितिको व्यवस्था मिलाएको बताउँदै उहाँले पालिकामा  कानुनी शासन कायम गर्न   प्रहरीले पनि पालिकालाई सक्दो सहयोग गरेको जानकारी दिनुभयो l

पालिकाले स्थानीय तहमा  सुशासन, शान्ति सुव्यवस्था कायम गरी  सुरक्षित समाज निर्माण गर्न प्रहरीलाई आवश्यक पर्ने सबैखाले सहयोग, समन्वय र सहजीकरण गर्दै आएको छ l शान्ति सुरक्षा र विपद् व्यवस्थापनलाई प्राथमिकतामा राखेर पालिकाले प्रहरीलाई सहयोग गर्न कुनै कसर बाँकी नराखेको अर्जुन चौपारी प्रहरी चौकीका प्रमुख प्रहरी वरिष्ठ नायव निरीक्षक ख्याम बहादुर क्षेत्रीले स्मार्ट अखबारलाई बताउनुभयो  l

अर्जुन चौपारी प्रहरी चौकीका प्रमुख क्षेत्रीका  अनुसार पालिकाले प्रहरीलाई मासिक रूपमा इन्धन र मर्मत  सुविधाका साथसाथै  आवश्यक परेको बेला चौबिसै घण्टा पालिकाको सवारी साधनहरू प्रयोग गर्न पाउने व्यवस्था मिलाएको छ l कार्यालय प्रयोजनका लागि आवश्यक पर्ने कम्प्यूटर , ल्यापटप, प्रिन्टर र स्टेशनरी सामाग्री पनि उपलब्ध गराएको छ l विपद् व्यवस्थापनका लागि आवश्यक पर्ने आधारभूत सामाग्रीहरू पनि पालिकाले प्रहरीलाई उपलब्ध गराएको छ l

प्रहरीसँग राम्रो समन्वय एवं सहजीकरण गरेकोमा  गण्डकी प्रदेश बाट २ वटा स्थानीय तह  उत्कृष्ट घोषित भएका हुन् l प्रदेश प्रहरी कार्यालय पोखराले गरेको मूल्याङ्कनमा स्याङ्जाको  अर्जुनचौपारी गाउँपालिका र बाग्लुङको बडीगाड गाउँपालिका उत्कृष्ट भएका हुन् l

Post Views: 23