त्रिभुवन आदर्श क्याम्पसमा कानुन पढाइने
![](https://smartakhabar.com/wp-content/uploads/2022/07/InCollage_20220701_171005439-1536x1229-1-1024x411.jpg)
स्याङ्जा, असार १८
युवराज पौडेल
![](https://smartakhabar.com/wp-content/uploads/2024/06/new-palika-jingle-rgb-1.jpg)
स्याङ्जा जिल्लाको सदरमुकामस्थित मालेबगरमा अवस्थित जिल्लाको पुरानो स्थापित सामुदायिक क्याम्पसका रुपमा चिनिने त्रिभुवन आदर्श बहुमुखी क्याम्पसमा यसै वर्षदखि कानुन विषयको पढाइ हुने भएको छ । कानुनको आकर्षण बढ्दै गए तापनि जिल्लामा कानुनको पढाइ कतै पनि नभएकाले एसइइपछि विद्यार्थी ११ र १२ पढ्न बाहिर जानुपर्ने अवस्था रहेकाले कानुन विषयको पढाइ सुरु गर्न लागिएको त्रिभुवन आदर्श बहुमुखी क्याम्पसका प्रमुख बाबुकुमार सिग्देलले बताउनुभयो । उहाँले भन्नुभयो, ‘जिल्ला अदालत स्याङ्जा नजिकै भएकाले जनशक्तिको पनि खाँचो नहुने र विद्यार्थीका आवश्यकता पनि पुरा हुने भएकाले यस वर्षदेखि कानुन विषयको पढाइ सुरु गर्न लागेका छौं ।’यस वर्षदेखि कानुन मात्र नभएर शिक्षा र व्यवस्थापन विषयमा पनि कक्षा ११ मा पढाइ सञ्चालन हुने सहायक क्याम्पस प्रमुख प्रमोद पंगेनीले बताउनुभयो । उहाँले भन्नुभयो, ‘विद्यार्थीहरुको एउटै छानामुनि कक्षा ११ देखि स्नातकोत्तरसम्म पढ्ने चाहनालाई सम्बोधन गर्नका लागि कक्षा ११ को पढाइ सुरु गर्न लागेका हौं ।’
पूर्व क्याम्पस प्रमुख अर्जुनबन्धु अर्यालले समुदाय र विद्यार्थीको चाहना र आवश्यकतालाई मध्यनजर गरेर कक्षा ११ र १२ मा कानुन, व्यवस्थापन र शिक्षाका कक्षाहरु सञ्चालन गर्न लागिएको बताउनुभयो । उहाँले भन्नुभयो, ‘धेरै विद्यार्थी र अभिभावकले हामीलाई यसका लागि प्रेरित गर्नुभयो । गरिब वर्गका तर निजी संस्थामा शुल्क तिर्न नसक्ने विद्यार्थीहरुका लागि पनि हामीले कक्षा ११ को पढाइ सुरु गर्दा राहत हुने भएकाले हामी यस कार्यमा अघि बढेका हौं।’
हालसम्म स्नातक र स्नातकोत्तरमा व्यवस्थापन शिक्षा र मानविकी सङ्कायका कक्षाहरु सञ्चालनमा रहेको यस क्याम्पसमा पछिल्लो समय विद्यार्थीको आकर्षण बढ्दै गएको छ । सामुदायिक क्याम्पस भएकाले यस क्याम्पसबाट विद्यार्थीले सस्तो शुल्कमा गुणस्तरीय शिक्षा पाइरहेको नेपाल विद्यार्थी सङ्घ क्याम्पस ईकाइका सभापति गौरव प्रधानले बताउनुभयो ।
त्रिभुवन आदर्श बहुमुखी क्याम्पस पूर्व शिक्षामन्त्री तथा उपप्रधानमन्त्री गोपालमान श्रेष्ठको विशेष सक्रियतामा समुदायद्वारा स्थापित तथा सञ्चालित क्याम्पस हो । हाल सञ्चालक समितिका अध्यक्ष समेत रहनुभएका श्रेष्ठकै पहलमा क्याम्पसमा शिक्षा र व्यवस्थापन सङ्कायमा स्नातकोत्तर कार्यक्रम समेत सञ्चालन भइरहेको छ ।