जनचेतना अभिवृद्धि गर्न जनप्रतिनिधिको सक्रियता
असोज १४, २०८०
बालमैत्री नगरपालिका भीरकोटमा विद्यार्थीहरूलाई विभिन्न विषयमा जनचेतना जगाउन जनप्रतिनिधि लागि परेका छन्। जिल्ला ट्राफिक प्रहरी कार्यालय स्याङ्जा, वडा प्रहरी वालिङ र दहथुम प्रहरी चौकीसँग समन्वय गरी भीरकोटका माध्यमिक विद्यालयहरूमा सडक सुरक्षा, लागू औषध दुर्व्यसनी , आत्महत्या , साइबर सुरक्षा लगायतका विषयमा जनचेतना जगाइएको हो।
बढ्दो सवारी दुर्घटना, लागू औषध दुर्व्यसनी , आत्महत्या र साइबर अपराधलाई न्यूनीकरण गर्ने उद्देश्यले जनचेतना अभिवृद्धिलाई प्राथमिकता दिइएको वडा नं ४ का जनप्रतिनिधि रूद्र ढुंगानाले बताए। ढुंगानाले प्रहरी अधिकारीहरू र विद्यालयहरूसँग समन्वय गरी जनचेतना अभिवृद्धिका लागि भीरकोटका माध्यमिक विद्यालयहरूमा पुगेका छन् ।
जिल्ला ट्राफिक कार्यालय स्याङ्जाका प्रमुख प्रविन आचार्यले पनि भीरकोटका विद्यालयहरूमा जनचेतना अभिवृद्धिको कार्यमा ढुंगानाले सक्रियतापूर्वक सहयोग र समन्वय गरेको बताए। ढुंगानाले जस्तै सबै जनप्रतिनिधिले सहयोग गर्ने हो जनचेतना जगाउने कार्य सहज र उपलब्धिमूलक हुने उनको भनाई छ। ट्राफिक सचेतनानै सडक दुर्घटना न्यूनीकरणको एक प्रमुख माध्यम भएकाले जनचेतना अभिवृद्धिलाई जिल्ला ट्राफिक कार्यालय स्याङ्जाले पनि प्राथमिकतामा राखेको आचार्यले बताए।हालसम्म आचार्यको अगुवाइ र सक्रियतामा जिल्लाका दुई दर्जन भन्दा बढी विद्यालयहरूमा ट्राफिक सचेतना अभिवृद्धिको काम भएका छन्। मुख्य शहरहरू स्याङ्जा र वालिङमा पनि पार्किङ व्यवस्थापनको कार्य भएको छ।
