सिरुबारीमा फागुन २३ बाट भलिबल प्रतियोगिता हुने
फागुन २१, २०७८
फागुन २१, २०७८, युवराज पौडेल
स्याङ्जाको आँधीखोला गाउँपालिका वडा नं १ सिरुबारीमा दसौं गम्भीरसिंह गुरुङ स्मृतिकप भलिबल प्रतियोगिताको आयोजना गरिएको छ । यही फागुन २३ गतेदेखि २७ गतेसम्म गरी कुल ५ दिनसम्म उक्त प्रतियोगिता सञ्चालन हुने भएको छ ।
यसभन्दा अगाडि पनि यहाँ स्मृतिकप भलिबल प्रतियोगिता आयोजना हुने गरेको थियो । पहिलेका संस्करणहरुमा गाउँपालिकाभित्रमात्र प्रतिस्पर्धा गराइने गरेको तर अहिले यसको दायरा बढाएर फेदीखोला, वालिङ, पर्वत, फलेबास लगायतका स्थानका टिमलाई पनि सहभागी गराइने भएको आयोजक टिमका संस्थापक मेजर लिलबहादुर गुरुङले बताउनुभयो ।
१६ भन्दा बढी टिमका बिचमा प्रतिस्पर्धा हुने उक्त भलिबल प्रतियोगिताको उद्घाटन फागुन २३ गते गण्डकी प्रदेश प्रमुख पृथ्वीमान गुरुङले गर्ने स्थानीय समाजसेवी उर्मिला गुरुङले जानकारी दिनुभएको छ ।
त्यस्तै २४ गते पूर्व सांसद तथा गण्डकी विश्वविद्यालयका कुलपति डाक्टर गणेशमान गुरुङ प्रमुख अतिथिका रुपमा आउने कार्यक्रम छ भने फागुन २५ गते गण्डकी प्रदेशका मुख्यमन्त्री कृष्णचन्द्र नेपाली तथा नेपाली काङ्ग्रेसका जिल्ला सभापति राजु थापा प्रमुख अतिथिका रुपमा कार्यक्रममा सहभागी हुने गुरुङले बताउनुभयो ।
समापनको दिन फागुन २७ गतेका दिन स्याङ्जा जिल्लाका प्रमुख जिल्ला अधिकारी राजुप्रसाद पौडेल प्रमुख अतिथिका रुपमा कार्यक्रममा सहभागी हुनुहुने छ ।
प्रतियोगिताको पुरस्कार राशि प्रथमका लागि रु १,०००००। (एक लाख), द्वितियका लागि रु ५०,०००। (पचास हजार) र तृतीयका लागि रु २५०००। (पच्चीस हजार) नगद र पदक र दिइने मेजर लिलबहादुर गुरुङले बताउनुभयो। प्रतियोगिताको सुपरीवेक्षण पूर्ण न्यौपाने, नेपाल भलिबल सङ्घका रेफ्रीहरु जीवन गुरुङ र विष्णुबहादुर थापाले गर्नेछन् ।
प्रतियोगिताको प्रायोजक भ्याली पब्लिक माध्यमिक विद्यालय भङ्गाल सुन्दरबस्ती रहेको कृष्णप्रसाद अधिकारीले बताउनुभएको छ । उक्त विद्यालले खेलाडी, स्वयम्सेवक तथा स्वतन्त्र पत्रकारका लागि पोसाक समेत उपलब्ध गराउने अधिकारीले बताउनुभयो ।
