बुबाआमाको स्मृतिमा छात्रवृत्ति अक्षयकोष स्थापना
साउन ०१, २०७९
स्मार्ट अखबार संवाददाता
१ साउन २०७९
अर्जुनचौपारी प्रहरी चौकीमा कार्यरत वरिष्ठ प्रहरी नायब निरीक्षक भेषराज रेग्मीले आफ्ना बुबाआमाको स्मृतिमा विद्यालयमा एक लाखको अक्षयकोष स्थापना गर्नुभएको छ। भीरकोट नगरपालिकाको दहथुम माध्यमिक विद्यालयमा रेग्मी परिवारले आज आइतबार एक लाखको अक्षयकोष स्थापना गर्नुभएको विद्यालयका प्रधानाध्यापक वेदप्रसाद अर्यालले जानकारी दिनुभयो।
वालिङ नगरपालिका–१ निवासी रेग्मीले उक्त रकम बराबरको चेक विद्यालयका प्रधानाध्यापक वेदप्रसाद अर्याललाई हस्तान्तरण गर्नुभएको छ। बुबा स्व. टीकाराम रेग्मी तथा माता स्व. सुशीला रेग्मीको स्मृतिमा टीकाराम सुशीला अक्षयकोष स्थापना गरिएको हो । अक्षयकोषको संरक्षकमा रेग्मीका भाइ दीपक रेग्मी र बहिनी प्रतिमा अधिकारी रेग्मी रहनुभएको छ। अक्षयकोषमा भेषराज रेग्मी, दिपक रेग्मी र प्रतिमा रेग्मीको आर्थिक सहभागिता रहेको रेग्मी परिवारले जनाएको छ।
उक्त अक्षयकोषको व्याजबाट कक्षा ८ र ९ मा अध्ययनरत गरिब तथा जेहेन्दार ४ जना विद्यार्थीलाई छात्रवृत्ति प्रदान गरिनेवरिष्ठ प्रहरी नायव निरीक्षक रेग्मीले जानकारी दिनुभयो। अक्षयकोषबाट प्राप्त ९० प्रतिशत व्याज छात्रवृत्तिमा खर्च गरिने छ भने १० प्रतिशत भने मूल धनमै थपिने छ। स्व. टीकाराम रेग्मीले ३५ वर्ष सोही विद्यालयमा अध्यापन गर्नुभएको थियो ।रेग्मी परिवारका १० छोराछोरी मध्ये ९ जनाले सोही विद्यालयबाट एसएलसी उतिर्ण गर्नुभएको थियो।
प्रहरी सेवामा कार्यरत भएपनि रेग्मीले सामाजिक सेवामा रूची राख्नुहुन्छ। उहाँले व्यक्तिगत खर्चमा आफ्नै वडाको वेवारिसे चौतारीको संरक्षण र पुन: निर्माण गर्नुभएको छ।
