स्याङ्जाको प्रसिद्ध छाँयाक्षेत्रधाममा संस्कृत पुस्तकालय स्थापना
![](https://smartakhabar.com/wp-content/uploads/2022/06/chhang-1024x536.jpg)
- स्मार्ट अखबार संवाददाता
७ असार २०७९
स्याङ्जाको प्रसिद्ध धार्मिक एवं ऐतिहासिक स्थल छाङ्छाङ्दी (छायाँक्षेत्र) मा ‘योगी नरहरिनाथ संस्कृत पुस्तकालय’ स्थापना गरिएको छ । विश्व हिन्दू युवा सङ्घको पहलमा पुस्तकालय स्थापना गरिएको विश्व हिन्दू युवा सङ्घ स्याङ्जाका अध्यक्ष नवराज पौडेलले जानकारी दिनुभयो। हाम्रो संस्कृति परम्परा तथा संस्कृत भाषा संरक्षण र सम्बर्द्धनका लागि संस्कृत पुस्तकालय स्थापना गरिएको अध्यक्ष पौडेलले जानकारी दिनुभयो ।
![](https://smartakhabar.com/wp-content/uploads/2024/06/new-palika-jingle-rgb-1.jpg)
“योगी नरहरिनाथले लेख्नुभएका पुस्तकको सङ्कलन गरेर पुस्तकालयमा राखेका छौँ, संस्कृत भाषाका अन्य पुस्तक पनि राखेका छौँ”, उहाँले भन्नुभयो, “संस्कृतको महत्वकाबारेमा आम नागरिकलाई बुझाउन सकेको खण्डमा संस्कृत भाषा लोप हुनबाट बचाउन सकिने ठानेर संस्कृत पुस्तकालय स्थापना गरेका हौँ ।” उहाँका अनुसार स्याङ्जाको ११ वटै पालिकामा संस्कृत पुस्तकालय स्थापना गर्नका लागि स्थानीय सरकार र सरोकारवालासँग समन्वय र सहकार्य भैरहेको छ।विश्व हिन्दू युवा सङ्घले विद्यार्थीमा नैतिक शिक्षाको अभाव भएको भन्दै विद्यालयमा नैतिक शिक्षा लागू गर्न माग गर्दै यसअघि ज्ञापनपत्र बुझाएको थियो । “संस्कृत पूजा गर्ने, कर्मकाण्ड चलाउने मात्रै भाषा होइन”, उहाँले भन्नुभयो, “यो विश्वकै सबैभन्दा प्राचीन भाषा हो, तसर्थ यसको महत्वकाबारेमा आजका पिँढीलाई बुझाउन सकेमात्रै भोलि पनि यो भाषा जीवित रहने भएकाले समयमै यतापट्टि ध्यान दिनु जरुरी भएको ठान्दछु ।”
![](https://smartakhabar.com/wp-content/uploads/2024/06/janahit_dengue-1.jpg)
पुस्तकालय औपचारीक रूपमा संचालनमा आउन बाँकी नै छ। छाँयाक्षेत्र मन्दिर व्यवस्थापन समितिका अध्यक्षको अस्वस्थताका कारण औपचारीक रूपमा संचालनमा आउन केही समय लाग्न सक्ने अध्यक्ष पौडेलले जानकारी दिनुभयो।