नगरपालिकाद्वारा एकुवार सिमलचौर सडकखण्डको स्तरोन्नती।
भदौ १३, २०७८
भदौ १३, भीरकोट खबर डेस्क,
भीरकोट नगरपालिकाले सामाजिक सन्जालमा आएका जायज माग र जन-गुनासोलाई पनि सम्बोधन गरेर थप जनमैत्री र प्रजातान्त्रिक बन्दै गएको प्रष्ट पारेको छ । आँधीखोला करिडोर अन्तर्गतको वडा नं. ६ मा पर्ने एकुवार-सिमलचौर सडकखण्डको नाजुक अवस्था र असहज आवागमनको विषयमा स्थानीय जनताहरूले सामाजिक संजाल फेसबुक मार्फत स्थानीय सरकारको ध्यानाकर्षण गराएको केही दिन भित्रै नगरपालिकाले उक्त सडक खण्डको स्तरोन्नती गरेको हो ।
वर्षात र नियमित मर्मत संभारको अभावमा उक्त सडकखण्डमा आवागमन असहज हुने गरी धेरै ठाउँमा माछा पोखरी स्वरुपका खाल्डाखुल्डीहरू बनेका थिए । नगरपालिकाले स्थानीय स्रोत साधन र डोजर प्रयोग गरी ग्राभेल गरेर सडकलाई साना सवारीमैत्री बनाएको हो । स्तरोन्नति भएपछि मोटरसाइकल, स्कुटर, अटोरिक्सा, ट्याक्सी लगायतका हलुका सवारी साधनहरू सहज रुपमा आवतजावत गर्न मिल्ने भएको छ । प्रदेश सरकारबाट गतबर्ष आँधिखोला करिडोर स्तरोन्नतिको नाममा सडक विस्तार भएको भएतापनि सडकको ग्रेडिङ र ड्रेनको उपयुक्त व्यवस्थापन नहुँदा सडकमा पानी जम्ने समस्या थियो । भीरकोट नगरपालिकाका नगरप्रमुख छायाराम खनालको निर्देशनमा गरिएको सडक स्तरोन्नति कार्यमा वडा नं. ६ का वडा अध्यक्ष लक्ष्मण खत्री क्षेत्री र आँधीखोला टोल विकास समितिका संयोजक दिपक कोइराला वर्षातको प्रवाह नगरी कार्यस्थलमा दिनभर खटिनुभएको थियो । सडक स्तरोन्नती भएपछि स्थानीय बासिन्दा खुसी छन् । नगर प्रमुख खनालका अनुसार नगरपालिकाले सडकको अवस्था हेरी अन्य स्थानहरुमा पनि सडक स्तरोन्नती गर्दै जानेछ । सामाजिक संजालमा जनगुनासोहरू हेर्दा जनताको पहिलो प्राथमिकता पनि सडक पूर्वाधारको दिगो विकास भएकाले जनचाहनाको समुचित सम्बोधन गर्न भीरकोट खबर भीरकोट नगरपालिकालाई हार्दिक अनुरोध गर्दछ ।
