८५ प्रतिशत अनुदानमा बोयर बोका वितरण
फागुन ०६, २०७८
६ फागुन २०७८
पुतलीबजार नगरपालिकाले कृषकहरूलाई ८५ प्रतिशत अनुदानमा बोयर बोका वितरण गरेको छ। नगरपालिका र संयुक्त राष्ट्र संघीय विकास कार्यक्रम (UNDP) को आर्थिक तथा प्राविधिक सहयोग र सुर्योदय क्लब स्याङ्गजाको व्यस्थापनमा संचालित कोभिड १९ उद्धार र सामाजिक आर्थिक प्रतिकार्य पहल अन्तर्गत ४ वटा बोयर बोका वितरण गरिएको हो। पुतलीबजारका वडा नं ५,६,७ र ८ मा १/१ वटाका दरले ४ वटा ७५ प्रतिशत शुद्धता भएका बोयर बोका वितरण गरिएको नगरपालिकाले जनाएको छ।
पुतलीबजारका वडा नं ५,६,७ र ८ लाई बाख्रा पकेट क्षेत्रको रूपमा विकास गर्ने उद्देश्यले परियोजनाकै रूपमा बाख्रा तथा बोका वितरण गरिएको सूर्योदय क्लबका अध्यक्ष अनन्त कुमार श्रेष्ठले जानकारी दिनुभयो।उहाँका अनुसार पुतलीबजारका ४ वटा वडालाई बाख्रा पालनकाे श्राेतकेन्द्रका रूपमा स्थापना र स्वराेजगारी सृजना गर्न नगरपालिका लागि परेको छ।अघिल्लो र यस बर्ष गरि २०० माउ बाख्रा निशुल्क वितरण गरिएकोमा किसानबाट २०० बाख्रा थप भई परियाेजनामा ४०० माउ बाख्रा भएका छन् भने अघिल्लो वर्षका ४ र यस बर्षका ४ गरि ८ वटा बोयर बाेका भएका छन्।
