नेबिसङ्घ पुतलीबजारद्वारा एसइइ उत्तीर्ण विद्यार्थीलाई सम्मान र काउन्सेलिङ
साउन २०, २०८०
युवराज पौडेल ,स्याङ्जा,
२० साउन २०८०
नेपाल विद्यार्थी सङ्घ पुतलीबजार कार्यसमितिले एसइइ मा उत्कृष्ट अङ्क प्राप्त गर्न सफल विद्यार्थीहरूलाई आज सम्मान तथा करियर काउन्सेलिङ कार्यक्रमको आयोजना गरि सम्मान गरेको छ ।
नेपाली काङ्ग्रेस जिल्ला पार्टी कार्यालयमा आयोजित उक्त कार्यक्रममा पुतलीबजार नगरभित्रका एसइइमा उत्कृष्ट अङ्क प्राप्त गर्ने विभिन्न विद्यालयहरूका विद्यार्थीहरूलाई सम्मान गरिएको हो ।
उक्त सम्मान तथा करियर काउन्सेलिङ कार्यक्रममा बोल्दै प्रमुख अतिथि नेपाली काङ्ग्रेसका क्षेत्रीय सभापति तथा पुतलीबजार नगरपालिकाका प्रमुख तुलसीराम रेग्मीले एसइइमा उत्कृष्ट अङ्क प्राप्त गर्ने विद्यार्थीहरूलाई आफूले विशेष छात्रवृत्तिको व्यवस्था गरेको बताए ।
उनले डिप्लोमा इन सिभिल इन्जिनियरिङ पढ्ने पुतलीबजारका १४ वटा वडाका २८ जना विद्यार्थीलाई छात्रवृत्ति स्वरूप रू १० लाख विनियोजन गरिएको बताउँदै शिक्षालाई पुतलीबजार नगरपालिकाले मुख्य प्राथमिकतामा राखेको जानकारी दिए ।
नेपाली काङ्ग्रेस महासमिति सदस्य तथा उपमेयर देवी अर्यालले सम्मानित विद्यार्थीहरूलाई बधाई दिँदै कडा मिहिनेत र अनुशासनलाई नछोडि अगाडि बढ्न सुझाव दिइन् ।
कार्यक्रममा गण्डकी प्रदेश सदस्य कुमबहादुर गुरूङले विद्यार्थीहरूलाई अनुशासनमा जोड दिन आग्रह गर्दै वीपीको शिक्षा सम्बन्धी भनाइ र सिद्धान्तहरू पढ्न आग्रह गरेका थिए ।
कार्यक्रममा नेपाली काङ्ग्रेस महासमिति सदस्यद्वय अनुप श्रेष्ठ र तारा मल्ल, नेपाल विद्यार्थी सङ्घ स्याङ्जाका सभापति गौरव प्रधान, नेपाली काङ्ग्रेस स्याङ्जाका सहसचिव ध्रुबबन्धु पौडेल, नेपाली काङ्ग्रेस पुतलीबजार नगरपालिकाका सभापति सुरजकुमार अधिकारी, त्रिभुवन आदर्श बहुमुखी क्याम्पसका प्रमुख बाबुकुमार सिग्देल, शिक्षक प्रकाश कोइराला लगायतले बोलेका थियो ।
करिब १०० जना एसइइमा उत्तीर्ण भएका उत्कृष्ट विद्यार्थीहरूलाई प्रमाणपत्र, खादा र अबिरले सम्मान गरिएको उक्त सम्मान तथा करियर काउन्सेलिङ कार्यक्रममा विद्यार्थीहरू अनुप पौडेल, प्रसन्न पाण्डे, तनिसा रेग्मी लगायतले नृत्य प्रस्तुत गरेका थिए ।
स्वतन्त्र विद्यार्थी युनियन त्रिआ क्याम्पस इकाई सभापति सविन रेग्मीको सभापतित्वमा भएको उक्त कार्यक्रममा विद्यार्थी नेता गोपी सुवेदीले स्वागत गरेका थिए भने कार्यक्रमको सञ्चालन स्ववियु उपसभापति महादेव कार्कीले गरेका थिए ।
