शिलान्यासमै सिमित भयो भीरकोट नगर अस्पताल
चैत ०३, २०७८
नारायणप्रसाद कोइराला
३ चैत्र २०७८
एक स्थानीय तह एक अस्पतालको अवधारणा अनुरुप भीरकोट -६ , एकुवारमा शिलान्यास गरिएको नगर अस्पतालको पूर्वाधार निर्माण कार्यप्रगति शुन्य छ।गत वर्ष मंसिर १५ गते तत्कालिन भूमी व्यवस्था, गरीबी निवारण तथा सहकारी मन्त्री पद्मा कुमारी अर्यालले शिलान्यास गरेको नगर अस्पतालका लागि स्वास्थ्य मन्त्रालयले १८ करोड विनियोजन गरिसकेको भएपनि अहिले सम्म डिपिआर निर्माणको काम बाहेक अन्य कुनै काम हुन नसकेको नगर प्रशासनले जनाएको छ।
खिलुङ्देउराली स्वास्थ्य चौकीको स्तरोन्नति गरि १५ शैयाको नगर अस्पताल बनाउन करिब ३६ लाखमा ९ रोपनी जग्गा खरिद गरिएको थियो।जग्गाको भौगोलिक अवस्थितीलाई विचार नगरी अस्पताल निर्माण प्रयोजनका लागि जग्गा खरिद गर्दा अहिले आएर समस्या भएको नगर प्रशासनले स्वीकार गरेको छ। उक्त स्थानमा अब अस्पताल बन्ने सम्भावना लगभग शुन्य रहेको नगरपालिका स्रोतले जानकारी दियो।प्रशासकीय अधिकृत खुमलाल भूसालका अनुसार उक्त जग्गामा तोकिएको मापदण्ड अनुसारको भौतिक संरचना निर्माण गर्दा थप १९ करोड खर्च हुन्छ।जुन रकम नगरपालिकाको करिब २ वर्ष बराबरको विकास बजेट हो।डिपिआर रिपोर्ट अनुसार उक्त ठाउँमा नगर अस्पताल निर्माण गर्न करिब ३७ करोड ५७ लाख लाग्ने भएकाले अस्पताल निर्माण गर्न सम्भव नरहेको बताइएको छ।यदी यस आर्थिक वर्षभित्र टेण्डर र निर्माणको काम भएन भने १८ करोड रूपैयाँ फ्रीज हुने र नगर अस्पताल निर्माण सपनामै सिमित हुने प्रष्ट छ।जग्गा खरिद, शिलान्यास र डिपिआर निर्माणमा लाखौं खर्च भैसक्दा पनि अस्पताल नबन्नुले हाम्रा जनप्रतिनिधिहरूको दुरदर्शिता र जवाफदेहिताको अवस्थालाई छर्लङ्ग पारेको छ।
शिलान्यासमै सिमित हुनुको अर्को कारण:
नगर कार्यपालिकाले हेलुमा रहेको कालिका सामुदायिक अस्पताललाई नै नगर अस्पतालको रूपमा विकास गर्ने गरि काम गरिरहेको छ।विधिवत रूपमा नगरको स्वामित्वमा नआएको भएपनि स्वास्थ्य सेवा प्रवाह र जनशक्ति व्यवस्थापनको काम नगर स्वास्थ्य शाखाले नै गरिरहेको छ।बजार केन्द्रित विकासलाई मात्रै प्राथमिकता राख्ने जनप्रतिनिधिहरूको सोचका कारण नयाँ अस्पताल निर्माणका आवश्यकता र औचित्य ओझेलमा परेको हो।तामझामका साथ शिलान्यास गर्न अग्रसर हुनुभएकी पूर्व मन्त्री अर्यालले पनि नगर अस्पताल निर्माणमा भएको ढिलासुस्ती एवं समस्याका बारेमा अहिले सम्म सार्वजनिक रूपमा कुनै चासो र चिन्ता व्यक्त गरिएको पाईंदैन।विकास भन्दा भाषण र आरोप -प्रत्यारोपलाई प्राथमिकता दिने जनप्रतिनिधिहरूको कार्यशैलीले शिलान्यास भएको एक वर्ष बितिसक्दा पनि कुनै कार्यप्रगती भएको छैन्।
विकल्प
नगरपालिकाका प्रमुख प्रशासकीय अधिकृत भूसालका अनुसार वडा नं ६ कै उपयुक्त स्थानमा नयाँ जग्गाको खोजी गर्न सकेमा नगर अस्पताल निर्माणको योजनालाई साकार पार्न सकिन्छ।नगर प्रशासन एवं नगर कार्यपालिकाले उपयुक्त स्थानमा यथासक्य चाँडो नयाँ जग्गा खरिद गर्न सकेमा नगर अस्पताल निर्माणले गति लिने निश्चित छ।एकुवारमा अस्पताल प्रयोजनका लागि खरिद गरिएको जग्गा नगरपालिकाको सम्पत्ति भएकाले अन्य सरकारी कामका लागि प्रयोग गर्न सकिन्छ। दहथुम प्रहरी चौकीको स्वामित्वमा जग्गा नहुँदा प्रहरीहरू त्रिपालले ढाकेको जिर्ण संरचनामा बस्न बाध्य छ्न्।यदि नगरले चाहेको खण्डमा उक्त जग्गा प्रहरीको लागि व्यवस्थित र सुविधा सम्पन्न भवन निर्माणमा समेत प्रयोग गर्न सकिने जानकारहरू बताउँछ्न्।
