जन्मदिनको अवसरमा शैक्षिक सामाग्री एवं आर्थिक सहयोग वितरण
चैत २०, २०७८
स्मार्ट अखबार संवाददाता, भीरकोट
२० चैत्र २०७८
अचेल जन्मदिनको अवसरमा फजुल खर्च गरी रमाइलो गर्ने प्रचलन बढिरहेको परिवेशमा नेपाली काँग्रेस भीरकोटका सभापती एवं वडा नं ५ का वडा अध्यक्ष याम प्रसाद अधिकारी (लक्ष्मण )ले उदाहरणीय कार्य गरि जन्मोत्सव मनाउनु भएको छ।
उहाँको जन्मदिनको अवसरमा भीरकोट जेसिजद्वारा आयोजित शुभकामना आदानप्रदान कार्यक्रममा भीरकोट जेसिज स्थापनाकर्ता समेत रहनुभएका अधिकारीले भीरकोटका विभिन्न विद्यालयमा अध्ययनरत ५५ जना विद्यार्थीहरूलाई शैक्षिक सामाग्री वितरण गर्नुभएको थियो। मानवताको सेवा नै जीवनको सर्वोत्तम कार्य हो भन्ने मुल नारा आत्मसाथ गर्दै आउनु भएका सकारात्मक विचारका अभियन्ता अधिकारीले सडक दुर्घटनामा परि उपचाररत अवस्थामा रहनुभएका भीरकोट ९ निवासी अनु गुरुङलाई नगद रकम रु ११,५५५/-आर्थिक सहयोग प्रदान गर्नुभएको थियो। सोही अवसरमा अधिकारीले भीरकोट-८ निवासी चोल बहादुर गुरुङलाइ बैसाखी पनि प्रदान गर्नुभएको थियो।कार्यक्रमकै दौरान नेपाल तरुण दल, भीरकोटका अध्यक्ष राजकुमार गुरुङले युके निवासी सुधा थापाले पठाउनुभएको सहयोग रकम रु ११,२००/- अनु गुरुङलाई हस्तान्तरण गर्नुभएको थियो। 
भीरकोट जेसिजका अध्यक्ष जेसि कृष्ण प्रसाद पौडेलको अध्यक्षतामा सम्पन्न उक्त कार्यक्रमको सञ्चालन महासचिव सुन्दर कोइरालाले गर्नुभएको थियो ।कार्यक्रममा उपस्थित सम्पूर्ण जेसिज पदाधिकारीले जन्मदिनको अवसरमा अधिकारीलाई शुभकामना प्रदान गर्नुभएको थियो।
