उत्पादनको जिम्मा नगरपालिकाले लिन्छ : नगर उपप्रमुख तिवारी
जेठ २४, २०८१ 
स्मार्ट संवाददाता
स्मार्ट संवाददाता 
स्याङ्जाको वालिङ नगरपालिकाले कृषि र पशुपालनबाटै पालिकावासीलाई आत्मनिर्भर बनाउने उद्देश्यले हेफर आधारशिला तालिम दिनु सुरु गरेको छ । वालिङ नगरपालिकामा सञ्चालनमा रहेको वालिङ कृषि विकास परियोजना अन्तर्गत वडा नं.२ मा तीन दिने तालिम सुरु भएको हो ।
तलिमको शुभारम्भमा बोल्दै वालिङ नगरपालिकाका उपप्रमुख कविता तिवारी गैह्रेले साना किसानलाई उत्पादनमा जोड्न पालिकाले विभिन्न काम गरिरहेको बताइन् । उनले भनिन् ,“उत्पादन बृद्धि भएमा मात्रै कृषकले आर्थिक लाभ लिन सक्छ ।” कृषकले उत्पादन गरेको सामाग्रीको बजारको जिम्मा नगरपालिकाले लिने भन्दै उपप्रमुख तिवारीले बजारको चिन्ता नगर्न कृषकलाई आग्रह गरिन ।छिटो र दिगो उत्पादन हुने कृषि खेती तर्फ ध्यान दिन उपप्रमुख तिवारीको सुझाव छ ।
कार्यक्रममा वालिङ नगरपालिका वडा नं.२ का वडा अध्यक्ष पोतप्रसाद लम्सालले अर्गानिक कृषि खेती तर्फ ध्यान दिन जरुरी रहेको बताए । उत्पादन धेरै गर्ने र लगानी कम गर्ने तरिका अपनाउनु पर्ने उनको भनाई छ । वडाले कृषकलाई ध्यानमा राखेर काम गरिरहेको जानकारी दिए ।
कार्यक्रम अन्तर्गत प्रदान गरिने कृषि औजारमा ७५ प्रतिशत अनुदान दिन आवश्यक रहेको भन्दै वडा अध्यक्ष लम्सालले पालिकाको तर्फबाट यसलाई ध्यानमा राख्नु पर्ने बताए ।
आर्थिक समृद्धिका लागि साझेदारी कार्यक्रम अन्तर्गत भोकालाई एक छाक भोजन होईन , जिउने जुक्ति सिकाऔँ भन्ने मूलनाराका साथ वालिङ नगरपालिका र हेफर प्रोजेक्ट नेपालको आर्थिक सहयोग तथा दियालो संस्थाको व्यवस्थापनमा तीन दिने आधारशिला तालिम सुरु भएको हो ।
तालिममा वालिङ नगरपालिका २ को हरियाली स्वावलम्वन महिला कृषक समूहका ३५ जना महिला सदस्यहरु सहभागीता रहेको छ ।तालिममा वालिङ कृषि विकास परियोजनाका कर्मचारीहरु सुस्मिता पौडेल र माया कुँवरले सहजीकरण गर्नेछ्न् ।
