गल्याङ नगरपालिकाले भर्चुअल माध्यमद्वारा नगरसभा गर्दै
माघ ११, २०७८
स्मार्ट अखबार संवाददाता
गल्याङ,माघ ११ ।
गल्याङ नगरपालिकाको १० औं नगर सभा भर्चुअल माध्यमद्वारा हुने भएको छ। बढ्दो कोरोना महामारीलाई मध्येनजर गर्दै जुम प्रविधिको प्रयोग गरेर यहि माघ १४ गते नगरसभा गर्न लागिएको नगरपालिकाका सुचना अधिकारी दशरथ उपाध्यायले जानकारी दिनुभयो ।
संविधानमा र स्थानिय तह संचालन ऐन २०७४ मा व्यवस्था भए अनुसार प्रत्येक आर्थिक वर्षमा नगरसभाकाे बैठक ६ महिनाकाे अन्तरालमा बस्ने गरेकाे छ। जसलाइ असारे र हिउँदे नगरसभा भन्ने गरिन्छ ।असारे नगरसभामा वार्षिक रूपमा हुने आर्थिक कार्यक्रमहरू,बजेट तथा अनुमान पारित गरि वार्षिक कार्यक्रम तयार गरिन्छ भने हिउँदे नगरसभामा आगामी ६ महिनामा कार्यतालिका अनुसार कार्यक्रमहरूलाई प्रभावकारी तरिकाले संचालन गर्नकाे लागि छलफल गरिन्छ ।
नगरपालिकाले सूचना जारी गर्दै सम्पूर्ण नगर सभा सदस्यहरू सबैलाई जुम मार्फत समयमै उपस्थित हुन आग्रह गरेको छ।Zoom प्रविधि बाट गरिने नगर सभाको सम्पूर्ण प्राविधिक तयारी सम्पन्न भएको नगरपालिकाका सूचना प्रविधि अधिकृत उदय खनालले स्मार्ट अखबारलाई बताउनुभयो । नगर सभाका सभासदहरु आ-आफ्नै घर वा कार्यालयबाट कार्यक्रममा सहभागिता जनाउन सक्नुहुनेछ। सूचना अधिकारी उपाध्यायका अनुसार नगर सभा सदस्यहरूले मात्रै नगर सभामा भाग लिन पाउनेछ्न्। नगरपालिकाले प्राविधिक सहयोगका लागि नगर, वडा कार्यालयमा कार्यरत कम्प्युटर अपरेटर तथा सूचना प्रविधि शाखामा सम्पर्क गर्न आग्रह समेत गरेको छ।
