गडहरे गुफाको भौगर्भिक अध्ययन सम्पन्न: विश्वकै ठूलो गुफा हुन सक्ने
भदौ २१, २०७८
भाद्र २१, भीरकोट खबर डेस्क,
स्याङ्जा जिल्ला भीरकोट नगरपालिका वडा नं.८ र ९ को सिमानामा अवस्थित गडहरे गुफाको भौगर्भिक अध्ययन सम्पन्न भएको छ।भीरकोट नगरपालिकाको पहलमा त्रिभुवन विश्वविद्यालय भूगर्भशास्त्र केन्द्रीय विभागबाट डा. कविराज पाैडेलकाे नेतृत्वमा खटिएको १० जना भूगर्भविद् तथा सहायक भुगर्भविद्हरुकाे टाेलीले गडहरे गुफाकाे भाैगर्भिक अध्ययन एवं अनुसन्धान गरेको वडा नं ९ का वडा अध्यक्ष भीम गरुङले बताउनुभयो । उक्त टाेलीले अध्ययनकाे क्रममा गुफा कसरी बन्याे,कहिले बन्याे, गुफा भित्र के कस्ता संरचना छन्, गुफा भित्रकाे भाैगर्भिक महत्व के छ भन्ने विषयमा अनुसन्धान गरेकाे छ।साथै गुफाकाे लम्बाइ चौडाई पनि मापन गरिएको छ।अध्ययनको विस्तृत प्रतिवेदन केही समय पछि सार्वजनिक गरिने जनाइएको छ । भीरकोट नगरपालिकाले यस गुफालाई पर्यटकिय क्षेत्रको रूपमा विकास गर्ने गुरूयोजना समेत बनाएर केही पूर्वाधार पनि विकास गरिसकेको छ।वडा अध्यक्ष गुरुङले सम्पूर्ण भीरकोटबासीलाई गुफाको प्रचारप्रसार गरिदिन अनुरोध समेत गर्नुभएको छ ।
गुफा भित्र शिबलिङ्ग,शङ्ख,शिव पार्वतीको जोडी, हात्ती, गाईको कल्चौडा लगायतका विभिन्न धार्मिक आकृतिहरू समेत छ्न्।अध्ययनका क्रममा गुफा भित्र करिब एक किलोमीटर यात्रा गर्दा गुफा भित्रै एउटा नयाँ झरना समेत फेला पारिएको छ।अध्ययनका क्रममा भूगर्भविद्हरूले यो गुफा नेपालको मात्र नभै विश्वकै सबैभन्दा ठूलो र लामो हुन सक्ने अनुमान गरेका छ्न्।गुफा भित्र प्रशस्त मात्रामा चमेराहरू पनि रहेका छ्न्।प्रारम्भिक अध्ययनका क्रममा केही ठाउँमा बाहेक गुफा बाहिरको भौगोलिक तथा भौगर्भिक वस्तुस्थिति राम्रो एवं बलियो रहेको र पर्यटकीय रूपमा आवश्यक पर्ने पूर्वाधार विकास गर्न सकिने बताइएको छ। अध्ययन टोलीले गुफाको भौगोलिक नक्सा समेत तयार गरेको छ।नगरपालिकाले तयार गरेको गडहरे गुफा विकास प्रस्ताव केन्द्रीय सरकारबाट स्वीकृत भैसकेको र नगरपालिका र केन्द्रीय सरकारको सहलगानीमा थप पूर्वाधारको विकासको काम अगाडि बढिरहेको वडा अध्यक्ष गुरूङले जानकारी दिनुभयो। धार्मिक तथा पर्यटकीय हिसावले पनि महत्वपूर्ण रहेको यो गुफाको संरक्षण तथा प्रचार प्रसार गर्न सकियो यो गुफा बालमैत्री नगरपालिका भीरकोटको अर्को पहिचान बन्न सक्ने प्रष्ट छ।
