एमाले जिल्ला कमिटी सदस्य काँग्रेस प्रवेश
चैत १८, २०७८
१८ चैत्र २०७८,फेदीखोला
नेकपा एमाले स्याङ्जाका जिल्ला कमिटी सदस्य लक्ष्मी प्रसाद बराल एमाले परित्याग गरी काँग्रेस प्रवेश गर्नु भएको छ । नेपाली काँग्रेसका केन्द्रीय सदस्य प्रदिप पौडेलले बराल लगायत एक सय भन्दा बढी एमाले कार्यकर्तालाई काँग्रेसमा भित्र्याउनु भएको काँग्रेस स्याङ्जाका प्रवक्ता भरत प्रसाद लम्सालले जानकारी दिनुभयो ।कार्यक्रममा बोल्दै केन्द्रीय सदस्य पौडेलले लोकतन्त्रको रक्षाका लागि सबै लोकतन्त्रप्रेमी व्यक्तित्वहरू काँग्रेस पार्टीमा समावेश हुनु पर्ने बताउनु भयो ।
“घर घर जाऔं काँग्रेस जिताऔं अभियान” अन्तर्गत आयोजना गरिएको कार्यक्रममा काँग्रेस स्याङ्जाका सभापति राजु थापा, फेदीखोला गाँउ सभापति महेन्द्र थापा लगायतले कार्यकर्तालाई प्रशिक्षण दिनुभएको थियो।एमाले फेदीखोलाका प्रभावशाली नेता समेत रहनु भएका बरालको काँग्रेस प्रवेशले गाउँपालिकामा नै ठुलो महत्व राख्ने स्थानीय नेताहरुले बताएका छन् ।काँग्रेसको एक महिने अभियान जिल्लाभर सञ्चालन भईरहेको छ ।
नेपाली काङ्ग्रेसले तामझाम सहित पार्टी प्रवेश गराएपनि नेकपा एमाले स्याङ्जाले भने पार्टी विधान विपरीत पार्टी विरोधी क्रियाकलापमा सक्रिय रहेको भन्दै पार्टी कमिटी तथा संगठित सदस्य समेतबाट निष्कासन गरेको थियो। 
