ड्रागन फुटको खेती तर्फ आकर्षित हुँदै बाँदर पीडित कृषकहरू
कार्तिक २५, २०७८
प्रकाश अर्याल , २५ कार्तिक २०७८ स्याङ्जा जिल्ला भीरकोट नगरपालिका वडा नं ५ पकानमा पनि सिउडी प्रजातिको फल ड्रागन फ्रुटको खेती गर्न लागिएको छ। खेतीयोग्य जमिन बाँदरको कारणले गर्दा बाँझो राख्नुपर्ने भएकाले पीडित कृषकहरू यसको खेती गर्न आकर्षित भएका हुन्।
पकानका दुई कृषकहरु रिखिराम तिवारी र जनक राज तिवारी मिलेर यो फलको खेती गर्न लाग्नु भएको हो। गल्याङ कृषि फर्मबाट व्यक्तिगत खर्चमा बिरुवाहरु किनेर उहाँहरूले ड्रागन फ्रुटको खेती गर्न लाग्नु भएको हो।फल हेर्दा प्याज जस्तो देखिएपनि यो अत्यन्तै मीठो र रसिलो हुन्छ । यसको अहिले बजार भाउ हेर्दा प्रति के.जी. रू ८०० देखि १००० रहेको पाइन्छ। उहाँहरूले गल्याङ कृषि फर्मबाट प्रती बिरुवा रु ३५० का दरले ५० बिरुवा खरिद गरि परिक्षण खेती गर्न लाग्नु भएको हो। बाँदरले हैरान नै पार्ने र रोपेको खेती भित्र्याउनै नदिने समस्याका कारण उहाँहरूले वैकल्पिक खेतीको रूपम ड्रागन फ्रुटको खेती गर्न लाग्नु भएको हो।
“बाँझो बारी भरि व्यवसायिक तरिकाले लगाउन त हुन्थ्यो तर बिरुवाको मूल्य नै अलि बढी भयो। बिरुवा मात्रै लगाएर भएन यसको लागि पिल्लर बनाउनु पर्यो । सबै काम गर्दा अलिक महँगो पर्ने भएकाले बरु नगरपालिकाले अनुदानमा बिरुवा उपलब्ध गराइदियो भने हामीहरुले व्यावसायिक रुपमै लगाउने योजनामा छौं। “भन्नु हुन्छ जनक राज तिवारी।
नगरपालिकाले कृषि क्षेत्रलाई प्राथमिकता राखेर कृषकहरुलाइ व्यावसायिक रुपमा खेति गर्न चाहने किसानहरुलाइ अनुदानमा बोट बिरुवाहरु उपलब्ध गराउने हो भने खेतीयोग्य जमिन बाँझो राख्न नपर्ने थियो र धेरै किसानहरु लाभान्वित हुने थिए।
