निवर्तमान नगर प्रमुख अधिकारीलाई पार्टीद्वारा कारबाही
![](https://smartakhabar.com/wp-content/uploads/2022/07/bhup-1024x536.jpg)
स्मार्ट अखबार संवाददाता
३२ असार २०७९
![](https://smartakhabar.com/wp-content/uploads/2024/06/new-palika-jingle-rgb-1.jpg)
नेकपा एमाले स्याङ्जाले गल्याङ नगरपालिकाका निवर्तमान नगर प्रमुख एवं जिल्ला कमिटी सदस्य भुपराज अधिकारीलाई गत स्थानीय चुनावमा पार्टी हित विपरीत गलत भूमिका खेलेको आरोपमा कारबाही गरेको छ ।पटकपटक स्पष्टीकरण सोध्दा पनि अधिकारीले तोकिएको समयसिमा भित्र जवाफ नदिएकाले पार्टीले ६ महिनाका लागि पार्टीका सबै जिम्मेवारीबाट निलम्बन गरेको हो ।उहाँलाई असार ३१ गते पार्टी अनुशासनको कारबाही गरिएको जिल्ला कमिटी अध्यक्ष सूर्यप्रसाद गैरे (पारस)ले जानकारी दिनुभयो ।
यही असार १३ गते बसेको पार्टी जिल्ला कमिटिको बैठकले निर्वाचनमा गलत भूमिकाको आशंका गरिएका नेता तथा कार्यकर्तालाई स्पष्टीकरण सोध्ने र कारबाही गर्ने विषयमा निर्णय गरेको थियो । गल्याङ्ग नगरपालिका स्तरीय समिक्षा बैठकमा उठेको विषय र अन्य धेरै प्रमाणहरुका आधारमा अधिकारीमाथि गम्भिर सवालहरु उठेको हुँदा ती सवाल तथा प्रश्नहरुमा स्पष्ट, यथार्थपरक र सन्तोषजनक जवाफ ३ दिनभित्र जिल्ला पार्टी कार्यालयमा बुझाउन २०७९ असार २० गते पार्टीले पत्र पठाएको थियो । उक्त पत्रको जवाफ नआएकोले पुनः असार २८ गते स्पष्टीकरणको लागि २ दिन समयसिमा राखी दोस्रो पत्र पठाइएको थियो । सो पत्रको पनि तोकिएको समयसिमा भित्र अधिकारीले जवाफ नदिएपछि पार्टी विधान अनुसार उहाँलाई पार्टीको जिल्ला सदस्य र अन्य सम्पूर्ण पदीय जिम्मेवारीबाट ६ महिनाको लागि निलम्बन गरिएको नेकपा एमालेका जिल्ला कमिटी अध्यक्ष सूर्यप्रसाद गैरे (पारस)ले जानकारी दिनुभयो ।