भीरकोटले विपन्न परिवारको निशुल्क स्वास्थ्य बीमा गरिदिने
जेठ १७, २०७९
नारायण प्रसाद कोइराला
१७ जेठ २०७९
स्याङ्जाको बालमैत्री भीरकोट नगर कार्यपालिकाको ८७ औं बैठक एवं नवनिर्वाचित जनप्रतिनिधिहरुको सोमबार बसेको पहिलो नगर कार्यपालिका बैठकले गरेका महत्त्वपूर्ण निर्णयहरू सार्वजनिक गरिएको छ।नगर कार्यपालिकाले गरेका निर्णयहरुका बारेमा जानकारी दिन आज आयोजित पत्रकार सम्मेलनमा नगर प्रवक्ता दिपेन्द्र के.सी.ले गरिब तथा विपन्न परिवारहरुलाई निशुल्क स्वास्थ्य बीमा गरिदिने निर्णय गरिएको बताउनुभयो।प्रवक्ता के.सी.का अनुसार भीरकोटमा करिब ५०० विपन्न घरपरिवार छ्न्।
भीरकोट नगर अस्पतालको स्वामित्व विधिवत रूपमा नगरपालिकामा सारेर नगर अस्पतालको सेवा प्रवाहलाई व्यवस्थित र प्रभावकारी गराउने तयारी गरिएको बताउँदै के.सी. ले नगर अस्पताललाई प्रथम सेवा प्रवाह विन्दु कायम गरी स्वास्थ्य बीमा गरेका परिवारको बीमा वापतको रकम नगरपालिकाले भुक्तानी गर्ने बताउनुभयो। त्यस्तै कार्यपालिकाको बैठकले भीरकोट नगरपालिकाभित्र स्थायी बसोबास गरेका र भीरकोट नगरपालिकाभित्रका स्वास्थ्य संस्थाहरुमा कम्तिमा चार पटक गर्भ जाँच गरेका र सुत्केरीपश्चात तीन पटक स्वास्थ्य जाँच गरेका सुत्केरी महिलालाई सम्बन्धित स्वास्थ्य संस्थाको , वडाको सिफारिस र जन्मदर्ता प्रमाणपत्रको आधारमा प्रसुति पोषण भत्तावापत प्रतिव्यक्ति पाँच हजार उपलब्ध गराउने निर्णय गरेको छ ।
यसैगरी नगरपालिकाभित्रका सामाजिक सुरक्षा भत्ता प्राप्त गर्ने लाभग्राहीमध्ये वृद्ध, अशक्त, अपाङ्गता भएका ब्यक्ति र विरामीहरुलाई सम्बन्धित बैंकसँग समन्वय गरी सम्बन्धित वडाबाट नै घर घरमै सामाजिक सुरक्षा भत्ता उपलब्ध गराउने निर्णय गरिएको छ । नगरपालिकाभित्रका क्षेत्रमा हाल सञ्चालनमा रहेका फ्रि वाईफाई जोनको अवस्था अध्ययन गरी सोबाट प्राप्त पृष्ठपोषणका आधारमा प्रत्येक वडाको ३ ठाउँ हुने गरी २७ ठाउँमा फ्रि वाईफाई जोन बनाउने निर्णय गरिएको प्रवक्ता केसीले बताउनुभयो।
निर्णयहरु सार्वजनिक कार्यक्रममा नगर प्रमुख गोविन्दकुमार कर्माचार्य, उपप्रमुख भगवती रेग्मी अर्याल, प्रमुख प्रशासकीय अधिकृत खुमलाल भुसाल, वडा अध्यक्षहरुको उपस्थिति रहेको थियो ।
