“हाम्रो भीरकोट”को विमोचन मिति तय
भदौ २६, २०७८
भाद्र २६, भीरकोट खबर डेस्क,
भीरकोट नगरपालिकाले आधारभूत तह कक्षा १-८ सम्मका लागि तयार गरेको स्थानीय पाठ्यक्रम “हाम्रो भीरकोट” को विमोचन यहि भाद्र २९ गते हुने भएको छ । राष्ट्रिय बाल दिवसको अवसर पारेर विमोचन गर्न लागिएको स्थानीय पाठ्यक्रमको पुस्तक कोरोना महामारी र अन्य प्रक्रियागत ढिलाइका कारण समयमै प्रकाशन नसकिएको जनाइएको छ । पाठ्यपुस्तक लेखनमा सहजीकरण गरेको संस्था साभ (SAAV) नेपालका अध्यक्ष डा. तुलसी खनालका अनुसार प्रदेश शिक्षा मन्त्री मेखलाल श्रेष्ठ लगायत विशिष्ट शिक्षाविद्हरू र पाठ्यपुस्तक लेखकहरूको उपस्थितिमा “हाम्रो भीरकोट” को विमोचन गरिने भएको हो।यो पुस्तक भीरकोटका निजी तथा सामुदायिक सबै विद्यालयहरूमा यो वर्षदेखि अनिवार्य विषयको रूपमा अध्यापन गराइने भएको हो । भीरकोट नगरपालिकामा बसोबास गर्ने मानिसहरूको धर्म, संस्कार, संस्कृति एवं प्राकृतिक, धार्मिक र ऎतिहासिक सम्पदाहरूको बारेमा विशेष जानकारीहरू समेटिएको पुस्तकबाट विद्यार्थीहरूले व्यवहारिक र नैतिक शिक्षा पनि प्राप्त गर्नेछ्न् । नगर शिक्षा शाखाका अनुसार १०० पूर्णाङ्कको यो स्थानीय विषयवस्तु समेटिएको पाठ्यपुस्तक सबै विद्यार्थीहरूलाई निशुल्क वितरण गरिने छ ।
