तीन दिनमा पनि बनेन जन्मदर्ता : सेवाग्राही
माघ २५, २०७८
माघ २४, २०७८
स्याङ्जाको भीरकोट नगरपालिकाको वडा नं ६ मा कर्मचारी र जनप्रतिनिधिको लापरबाहीको कारण सेवाग्राही मर्कामा परेका छ्न्।कार्यालय समयमा विना सूचना ढिलो अनुपस्थित हुने वा चाँडो फर्कने नियमित रूपमै भएको सेवाग्राही बताउँछ्न्।आज सेवा लिन पुगेका एक सेवाग्राहीले भन्नुभयो, “कम्प्युटर चलाउन जान्ने कर्मचारी रैनछ्न् । कुर्दा कुर्दा जान्ने कर्मचारी आएनन्, अनि फर्केँ।” स्रोतका अनुसार कम्प्युटर/ सफ्टवेयर चलाउन नजान्ने कर्मचारी भनिएका व्यक्ती तिल बहादुर रोकाहा चाहिँ वडाका कर्मचारी होइनन्।अनाधिकृत व्यक्तिले सेवा दिएको विषयमा वडा मौन छ।
अर्का एक जना सेवाग्राहीले भन्नुभयो, “जन्मदर्ता बनाउन म तीन दिन वडा कार्यालय पुगिसकेँ।पहिलो दिन सर्भरले काम गरेको छैन भनेर फर्काइयो।दोस्रो दिन सचिव पर्खाइमा बस्दा बस्दै उहाँ बयरघारीबाटै फर्कनुभयो भनेर फर्कन बाध्य भएँ।आज तेस्रो दिन कार्यालयमा गएको कार्यालयमा खुला तर रित्तो थियो।” सपरिवार वैदेशिक रोजगारीमा रहेका उहाँले थप्नुभयो, “वैदेशिक रोजगारीमा जान अब २ दिन बाँकी छ।काम हुने नहुने निश्चित छैन्।”
यस विषयमा प्रमुख प्रशासकीय अधिकृत खुमलाल भुसालसँग सम्पर्क गर्दा वडा कर्मचारी परिचालनको विषयमा वडा अध्यक्ष बढी जिम्मेवार हुनुपर्ने र यदि कर्मचारीको लापरबाही पुष्टि भएमा नगर प्रशासनले आवश्यक कारबाही गर्ने बताउनुभयो।
वडा अध्यक्ष लक्ष्मण खत्री क्षेत्री सँग सेवाग्राहीको गुनासोको बारेमा सम्पर्क गर्दा आफू काम विशेषले नगर बाहिर रहेको बताउँदै कम्प्युटर अपरेटर दुर्गा थापा अधिकारी विदामा रहेको र अर्का कर्मचारी अचानक स्वास्थ्य समस्या आइपरेकाले स्वास्थ्य सुविधा लिन निस्केको बताउनुभयो । तर वडा सचिव चाहीँ कार्यालयमै हुनुपर्ने उहाँको दाबी थियो।
