भाग्योदयमा एकीकृत छात्रवृत्ति अक्षयकोष गठनको तयारी
कार्तिक ०२, २०७८
भीरकोट खबर डेस्क, कार्तिक २
स्याङ्जा जिल्लाको भीरकोट नगरपालिका वडा नं. ६ मा अवस्थित भीरकोटकै उत्कृष्ट सामुदायिक विद्यालय भाग्योदय माध्यमिक विद्यालयले एकीकृत छात्रवृत्ति अक्षयकोष बनाउने भएको छ । आर्थिक अवस्था कमजोर भएका गरिब तथा जेहेन्दार विद्यार्थीहरूलाई छात्रवृत्ति प्रदान गरी उनीहरूलाई शैक्षिक अवसर प्रदान र प्रोत्साहन गर्ने उद्देश्यले संस्थापक, शिक्षाप्रेमी, बुद्धिजीवी र समाजसेवी लगायतका ३१ जना व्यक्तित्वहरूले विद्यालयमा आफ्ना स्वर्गीय बुवाआमा र आफन्तजनको नाममा अक्षयकोष स्थापना गर्नुभएको विद्यालयका प्रधानाध्यापक रेशमलाल खनालले जानकारी दिनुभयो ।
अक्षयकोष दाताको संख्या निरन्तर बढीरहेकाले फरकफरक व्यक्तिको नाममा फरकफरक खाता खोली अक्षयकोष संचालन गर्न झन्झटिलो भएकाले विद्यालयले “श्री भाग्योदय एकीकृत छात्रवृत्ति अक्षयकोष ” नामक संस्था गठन गरी अक्षयकोषको रकमलाई एकमुष्ट गर्दै एउटै बैंकमा खाता खोली अक्षयकोष र छात्रवृत्तिलाई व्यवस्थित बनाउन खोजेको हो।एकीकृत गरि रकम एकमुष्ट गरे पनि अक्षयकोष दाताको नाम , रकम र छात्रवृत्ति प्रदान गरिने विधा फरक नपर्ने गरि छात्रवृत्ति कोष व्यवस्थित गर्न लागिएको विद्यालयका शिक्षक पुण्यप्रसाद खनालले जानकारी दिनुभयो।खनालका अनुसार हाल सम्म अक्षयकोषमा १५ लाख ४१हजार ३ सय ६ रूपैयाँ नगद रहेको छ।सोही रकमबाट प्राप्त हुने व्याज वार्षिकोत्सबको अवसरमा तोकिएको विधाका विद्यार्थीहरूलाई छात्रवृत्ति दिने गरिएको छ।विद्यालय व्यवस्थापन समितिका अध्यक्ष नै अक्षयकोषको अध्यक्ष रहने गरी अक्षयकोष र छात्रवृत्तिलाई व्यवस्थित गर्न खोजिएको विद्यालयले जनाएको छ।
केही व्यक्तित्वहरूले कोष स्थापना नै नगरी तथा केहीले प्रतिष्ठान स्थापना गरी व्यक्तिगत रुपमै छात्रवृत्ति वितरण गरेकाले उहाँहरूलाई समेत एकीकृत छात्रवृत्ति अक्षयकोष समावेश गर्ने लक्ष्य रहेको विद्यालयले जनाएको छ।एकीकृत छात्रवृत्ति अक्षयकोषको विधान निर्माण भैसकेको छ। आवश्यक परिमार्जन पछि तिहार अगावै एकीकृत छात्रवृत्ति अक्षयकोषको गठन तथा खाता संचालन गरिने भएकाले सरोकारवाला सबैलाई विद्यालयको सम्पर्कमा आउन र विधान परिमार्जनमा समेत सहजीकरण गर्न विद्यालयले अनुरोध गरेको छ।इमेल मार्फत विधान अध्ययन गर्न चाहने सरोकारवाला व्यक्तिहरूले विद्यालयका शिक्षक पुण्यप्रसाद खनाललाई सम्पर्क गर्न सकिने विद्यालयले जनाएको छ।
२०३३ सालमा स्थापना भएको यस विद्यालयमा कक्षा १२ सम्मको पठनपाठन हुँदै आएको छ । भीरकोटकै नमूना र उत्कृष्ट सामुदायिक विद्यालयको रूपमा स्थापित भैसकेको यस विद्यालयमा प्राविधिक धारतर्फ भने बालीविज्ञान अन्तर्गत १८ महिने जे.टी.ए कार्यक्रमको पठनपाठन हुँदै आएको छ।
