बालोदय मा.वि. मा प्रथम त्रैमासिक परीक्षा सम्पन्न
भदौ १०, २०७८
भाद्र १०, भीरकोट खबर डेस्क
भीरकोट नगरपालिका वडा नं ६ ,सुन्दर बजारमा अवस्थित बालोदय मा.वि. मा शैक्षिक सत्र २०७८ को पहिलो त्रैमासिक परीक्षा सम्पन्न भएको छ । जेठ १७ गतेदेखि जूम (ZOOM) प्रविधिको प्रयोग गरेर नियमित कक्षा संचालन गरेको विद्यालयले भौतिक उपस्थितमै परीक्षा संचालन गरेको थियो। भदौ १ देखि १० गते सम्म संचालित परीक्षामा लगभग सबै विद्यार्थीहरू सहभागी भएका थिए । बिहान ७ बजेदेखी दिउँसो २ बजेसम्म ५ सिफ्टमा संचालन गरिएको परीक्षामा एक बेञ्चमा एक जना विद्यार्थीका दरले एउटा कोठामा न्युनतम १० र अधिकतम १५ विद्यार्थी राखिएको थियो । विद्यार्थीहरू परीक्षा हलमा प्रवेश गर्नु अगावै मास्क, सेनिटाइजर प्रयोग गर्ने र थर्मल गनको प्रयोग गरि शरिरको तापक्रम नाप्ने व्यवस्था समेत गरिएको थियो ।
विद्यालयले जिल्ला प्रशासन कार्यालय स्याङ्जाको अनुमती लिएर भौतिक उपस्थितिमा परीक्षा संचालन गरेको हो।विद्यालय प्रिन्सिपल अमृत अर्यालले नपढीकन विना परीक्षा पास भैइन्छ भन्ने प्रवृतिलाई अन्त्य गर्न र प्रभावकारी मूल्यांकन गर्न विषम परिस्थितिमा पनि अभिभावक सँग सल्लाह गरी जनस्वास्थ्यका मापदण्डहरू पालना गरेर परीक्षा संचालन गरिएको बताउनुभयो। विद्यालय प्रशासनका अनुसार निर्णयात्मक र निर्माणात्मक दुबै पद्धतिलाई अवलम्बन गर्दै भदौ २७ गते ग्रेडिङ सिस्टममा परीक्षाफल प्रकाशन गरिने छ ।
