विद्यालयलाई आर्थिक रूपमा आत्मनिर्भर बनाउन सुन्तला खेतीको तयारी
असोज १७, २०८०
![Krishi](https://smartakhabar.com/wp-content/uploads/2023/10/orenge.jpg)
स्मार्ट संवाददाता
१७ असोज २०८०
![](https://smartakhabar.com/wp-content/uploads/2023/09/wh1.jpeg)
स्याङ्जाको प्रतिष्ठित सामुदायिक विद्यालय कालिका माध्यमिक विद्यालयले आफ्नो ५० रोपनी जग्गामा सुन्तला खेती गर्ने निर्णय गरेको छ। पुतलीबजार नगरपालिका वडा नं १३ मा अवस्थित विद्यालयले भीरकोट नगरपालिका वडा नं ७ बलमाटामा आफ्नो स्वामित्वमा रहेको ५० रोपनी पाखोमा नमुना सुन्तला बगैंचा निर्माण गर्ने भएको हो। विद्यालय व्यवस्थापन समिती र शिक्षक अभिभावक संघले संयुक्त रूपमा निर्णय गरी सोही प्रयोजनका निम्ति विद्यालयलाई प्रधानमन्त्री कृषि आधुनिकीकरण परियोजना,परियोजना कार्यान्वयन इकाइ सुन्तला सुपरजोन स्याङ्जामा सूचीकृत गरिएको छ।
विद्यालयलाई आर्थिक रूपमा आत्मनिर्भर बनाउन सुन्तला खेती गर्ने योजना बनाइएको विद्यालय व्यवस्थापन समितिका अध्यक्ष मीन प्रसाद कोइरालाले जानकारी दिए। उनका अनुसार नमुना सुन्तला बगैंचामा २ हजार बोट सुन्तला रोप्न सकिने छ । बगैँचा निर्माणका लागि आवश्यक सुन्तलका विरूवा ,औजार उपकरण र सिंचाइ कार्यक्रम माग सहित सुन्तला सुपरजोन स्याङ्जामा प्रस्तावना पेश गरिएको अध्यक्ष कोइरालाले बताए। “विद्यालयको शैक्षिक र भौतिक विकासका लागि दिगो आर्थिक स्रोत जुटाउन सुन्तला खेती गर्ने योजना गरिएको हो। यसबाट विद्यालयलाई वार्षिक करिब १ करोड रूपैयाँ भन्दा बढी आम्दानी हुनेछ। उक्त रकमबाट विद्यालयले प्राविधिक शिक्षा दिने योजना बनाएको छ।” अध्यक्ष कोइरालाले भने।
विद्यालयका प्रधानाध्यापक वीर बहादुर क्षेत्रीले विद्यालय व्यवस्थापन समितिका अध्यक्षको योजना अनुसार विद्यालयको स्वामित्वमा रहेका विभिन्न ३ वटा कित्तामा रहेका करिब ५० रोपनी जग्गामा सुन्तला खेती गर्ने योजना बनाइएको बताए।
![](https://smartakhabar.com/wp-content/uploads/2023/06/ad-janahit.jpg)