स्थानीयको सक्रियतामा बाटो मर्मतः अर्जुनचौपारी
भदौ २५, २०७८
भाद्र २५, भीरकोट खबर डेस्क,
जिल्लाको अर्जुनचौपारी गाउँपालिका वडा नम्वर १ ढाँडा, दारेगौंडा (दलित बस्ती) मा स्थानीयकै सक्रियतामा सडक मर्मत भएको छ । करिव १.५ कि.मी सडक चौडा गरिएको छ । मर्मतका लागि स्थानीयहरु पनि सहयोगमा जुटेका छन् । वडा न १ बाट नेपाली कांग्रेसका क्षेत्रीय प्रतिनीधि तथा तरुण विभाग गण्डकी प्रदेशका सदस्य सरोज पौडेल र कांग्रेसका स्थानीय नेता विष्णु रोकाको निजी सहयोगमा बाटो विस्तार कार्यलाई तिव्रता दिइएको हो । उक्त बाटो मर्मतका लागि स्थानीय उपभोक्ताहरुले बारम्बार वडाध्यक्ष चित्रबहादुर विष्टलाई अनुरोध गर्दा पनि वेवास्ता गरेको स्थानीयको आरोप छ । वडाध्यक्ष विष्टले बाटो मर्मतमा चासो नदेखाएपछि मात्र १ मतले हारेका वडाध्यक्षका प्रत्याशी विष्णु रोका स्वयंको अगुवाईमा बाटो मर्मत भएको छ । पौडेल र रोकाको साथ र सहयोग लिएर स्थानीय युवाहरु पनि बाटो मर्मतमा जुटेका छन् । स्थानीय ढाँडादेखि दलितबस्ति हुँदै गुप्तेश्वर महादेव मन्दिरसम्मको बाटो मर्मत भएको पौडेलले जनाएका छन् । विकासको जिम्मा लिएका अध्यक्ष निरिह भएको र केही काम गर्न नसकेको स्थानीयको आरोप छ । कांग्रेसका युवा प्रतिनीधि पौडेल र समाजसेवी रोकाको अग्रसरताले सडक मर्मत सम्पन्न भै आवतजावत सहज भएकोमा स्थानीय खुशी छन् ।
