अध्यक्ष कप तथा खेलकुद महोत्सव सुरु
मङि्सर १४, २०८१ 
स्मार्ट संवाददाता
स्मार्ट संवाददाता 
कालीगण्डकी गाउँपालिकामा छैठौं अध्यक्ष कप तथा खेलकुद महोत्सव आजबाट सुरु भएको छ । कालीगण्डकी गाउँपालिका -७ मिर्मी खेलमैदानमा संचालित महोत्सवको सञ्चार तथा सूचना प्रविधि मन्त्री पृथ्वीसुब्बा गुरुङले उद्घाटन गर्नुभएको हो ।
शुक्रबारदेखि तीन दिनसम्म चल्ने खेलकुद महोत्सवमा महिला/पुरुष फुटबल, भलिबल, क्रिकेट, ब्याडमिन्टन(एकल तथा डबल), टेबल टेनिस(एकल तथा डबल), दौड, बुद्धिचाल खेल हुनेछन् ।
सात खेल २२ विधामा प्रतिस्पर्धा हुने खेल महोत्सवमा कालीगण्डकी गाउँपालिकाका प्रत्येक वडाबाट ९८ जनाको दरले झण्डै ७०० जना खेलाडी सहभागी रहेको पालिका अध्यक्ष खिम बहादुर थापाले जानकारी दिनुभयो।
विगत सात वर्षदेखि प्रतियोगिता भइरहेको अध्यक्ष कप तथा कालीगण्डकी खेलकुद महोत्सव -२०८१ मा २२ स्वर्ण, २२ रजत र २२ कास्य पदकका लागि प्रतिस्पर्धा हुनेछ । प्रतियोगिताका विजेता तथा उपविजेतालाई नगद पाँच लाख १० हजार रुपियाँ पुरस्कार वितरण गरिने पालिकाले जनाएको छ ।
अध्यक्ष कप तथा कालीगण्डकी खेलकुद महोत्सव -२०८१ मा सहभागी खेलाडीले खेलमैदानमा मार्चपास समेत गरेका छन् । खेल महोत्सव उद्घाटन गर्नु अघि मन्त्री गुरुङले मिर्मी बजारमा कालीगण्डकी अस्पतालमा रहेको आधारभूत आँखा उपचार केन्द्रको उद्घाटन गर्नुभएको थियो ।
