खबर र खबरदारी, हाम्रो जिम्मेवारी

पुष १८, २०८१

सम्पादकीय

“खबर र खबरदारी हाम्रो जिम्मेवारी” भन्ने मूलमन्त्रका साथ हामी स्याङ्जा र आसपासका क्षेत्रका जनताको आवाज उठाउँदै आएका छौं। हाम्रो उद्देश्य केवल समाचार प्रकाशित गर्नु मात्र होइन, सही कामको प्रशंसा र गलत क्रियाकलापहरूको भण्डाफोर गरेर जनतालाई सचेत गराउनु हो। स्थानीय सरकारहरूले गरेका राम्रा कामहरूको प्रचारप्रसार गर्नु र उनीहरूका कमीकमजोरीलाई उजागर गर्नु हाम्रो जिम्मेवारी हो।

आजको समयमा सुशासन, वातावरण संरक्षण, र दीगो विकास हाम्रो समाजका प्रमुख मुद्दाहरू हुन्। यस पवित्र अभियानमा साथ दिने क्रममा, हामीले देखेका छौं कि जनताको करबाट सञ्चालित बजेटको दुरुपयोग, योजनाहरूको अपारदर्शी कार्यान्वयन, र प्राकृतिक स्रोतहरूको दोहनजस्ता समस्याहरूले हाम्रो समाजलाई दीर्घकालीन असर पारिरहेका छन्। यी समस्याहरूलाई उजागर गर्दा कहिलेकाहीँ हामी आलोचनाको पनि सिकार बन्ने गरेका छौं। जनप्रतिनिधिहरूको रूष्टता हामीलाई रोक्ने होइन, हाम्रो सत्य खोज्ने इच्छाशक्तिलाई थप बलियो बनाउने प्रेरणा हो।

संचार माध्यमको मूल उद्देश्य सत्य र तथ्यलाई उजागर गर्नु हो। तथापि, कतिपय अवस्थामा प्रकाशित समाचारमा असहमति व्यक्त गर्न पाइन्छ। यदि कुनै समाचार तथ्यहीन वा भ्रामक छ भने त्यसलाई प्रमाणसहित खण्डन गर्न सकिन्छ। हामी नियामक निकायमार्फत न्याय प्राप्त गर्न सक्ने वैधानिक अधिकारलाई स्वागत गर्दछौं। तर, सत्यमा आधारित समाचारलाई दबाब, धम्की, वा अप्रत्यक्ष प्रभावका माध्यमबाट हटाउन खोज्नु केवल पत्रकारिताको मर्यादामाथिको उल्लंघन मात्र होइन, लोकतान्त्रिक मूल्यमान्यतामाथिको चुनौती पनि हो।

हामीलाई थाहा छ, हाम्रा शब्दहरूले कहिलेकाहीँ केही शक्तिशाली व्यक्तिहरूलाई असहज बनाउनेछ। तर, हाम्रो कलमले सधैं सत्यको पक्षमा काम गर्ने प्रतिज्ञा गरेको छ। हाम्रो खबरदारी कुनै पनि व्यक्तिगत स्वार्थ वा पूर्वाग्रहमा आधारित छैन। यो जनताको हक र अधिकारलाई सुनिश्चित गर्न गरिएको प्रयास हो।

पाठकहरू हाम्रो कामको मर्म बुझेर साथ दिनु भएको छ, जसले हामीलाई अझै जिम्मेवार र प्रतिबद्ध बनाएको छ। हाम्रो समाचारलाई विश्वास गरी, गलत कामको विरुद्ध खबरदारीको आवाजमा साथ दिएर, तपाईंहरूले हाम्रो हरेक प्रयासलाई सफल बनाउनु भएको छ। यो भरोसाले हामीलाई अझै जिम्मेवार र सत्यनिष्ठ बन्न प्रेरित गरेको छ।

सामाजिक न्याय, सुशासन, र पारदर्शिता स्थापित गर्न हामी हाम्रो जिम्मेवारीमा कुनै सम्झौता गर्नेछैनौं। हामी हाम्रो समाचारको विश्वसनीयता र निष्पक्षतामा सदैव दृढ रहिरहने छौं। तपाईं, पाठकहरूको समर्थन, हाम्रा लागि प्रेरणाको स्रोत हो। तपाईंको निरन्तर सहयोगले हामीलाई सत्य र इमानको मार्गमा अघि बढ्न थप शक्ति प्रदान गर्नेछ।

तपाईंहरूलाई यो भरोसा दिलाउँदै, हामी हाम्रो जिम्मेवारीमा थप प्रतिबद्ध रहने वाचा गर्दछौं। सत्य, पारदर्शिता, र जिम्मेवारीपूर्ण पत्रकारिताको यो यात्रामा तपाईंहरूको विश्वास र समर्थन अमूल्य छ। धन्यवाद!