मगर समुदायका महिलालाई नौमती बाजा बजाउने तालिम
मङि्सर २७, २०८१ 
स्मार्ट संवाददाता
स्मार्ट संवाददाता 
भीरकोट नगरपालिकाका महिलाहरूलाई नौमती बाजा बजाउने तालिम संचालन गरिएको छ। वडा नं ६ मा मगर समुदायका महिलाहरूलाई लक्षित गरी नौमती बाजा तालिम सञ्चालन गरिएको हो। परम्परागत संस्कृति संरक्षण र बाजा बजाउने सिपको पुस्तान्तरण गर्ने उद्देश्यले वडा कार्यालयको आयोजनामा १६ जना महिलाहरूको सहभागितामा तालिम सुरु गरिएको हो।
वडा अध्यक्ष लक्ष्मण खत्री क्षेत्री (रामकाजी) ले परम्परागत बाजा र नाचलाई जोगाउँदै महिलाहरूलाई व्यवसायिक र आत्मनिर्भर बनाउन तालिम संचालन गरिएको बताउनुभयो।
भीरकोट नगरपालिकाका उपप्रमुख भगवती रेग्मी अर्यालले महिलाहरूले आफ्नो परम्परागत सिप सिक्न र संरक्षण गर्न देखाएको सक्रियताको प्रशंसा गर्दै यसलाई आत्मनिर्भरता र महिला सशक्तिकरणको उदाहरणको रूपमा लिन आग्रह गर्नुभयो।
सिमलचौर सामुदायिक भवनमा बुधबारदेखि सुरू भएको यो तालिम १ महिनासम्म सञ्चालन हुनेछ। सहभागीहरूलाई प्रशिक्षक तिल बहादुर परियारले प्रशिक्षण दिनुहुनेछ। तालिमले महिलाहरूलाई सांस्कृतिक सम्पदा संरक्षणका साथै नौमती बाजा बजाउने व्यावसायिक सीप प्रदान गर्ने अपेक्षा गरिएको छ।
तालिम र बाजा खरिदका लागि वडाले २ लाख ५० हजार बजेट छुट्याएको छ। यो पहलले परम्परागत संस्कृति संरक्षणका साथै महिलाहरूको सीप र आत्मविश्वास वृद्धि गर्न महत्त्वपूर्ण भूमिका खेल्ने विश्वास गरिएको छ।
