बाल दिवसको अवसरमा पञ्चेबाजा प्रतियोगिता
भदौ २९, २०८१ 
स्मार्ट संवाददाता
स्मार्ट संवाददाता 
‘बालबालिकामा लगानी सुनिश्चित भविष्यको थालनी’ भन्ने मुलनाराकासाथ आयोजित ६० औं राष्ट्रिय बाल दिवसको अवसरमा सामाजिक विकास कार्यालय स्याङ्जाले बालबालिका समूहहरुबीच पञ्चेबाजा प्रतियोगिता गरेको छ ।
जिल्लाब्यापी प्रतियोगितामा १२ पञ्चेबाजा समूहको सहभागिता रहेको थियो।आधुनिकताले। हाम्रा परम्परा, लोकबाजा, लोक संस्कृतिमा पारेको प्रभाव न्यूनीकरण गर्न र विद्यार्थीलाई लोकबाजातर्फ आकर्षित गर्न प्रतियोगिता आयोजना गरिएको हो ।
कार्यक्रममा स्याङ्जाका प्रमुख जिल्ला अधिकारी सुनिता नेपालले यस कार्यक्रमले विद्यार्थीहरू हाम्रो संस्कार, सीप, कला र संगीतको संरक्षण गर्न सक्षम हुनुका साथै उत्प्रेरित हुने बताउनुभयो ।
पुरानो पुस्तामा रहेको सीप नयाँ पुस्तामा पुस्तान्तरण हुनुकासाथै हाम्रा संस्कार संस्कृतिको संरक्षणकालागि पनि यस प्रतियोगिताले महत्वपूर्ण भूमिका खेलेको दावी सामाजिक विकास कार्यालय स्याङ्जाका प्रमुख जीवन पौडेलको गर्नुभयो ।
कक्षा एकदेखि कक्षा १२ सम्म अध्ययनरत बालबालिकाको समूह, टोल, बालक्लब, वडा कार्यालय, पालिकास्तरीय समूह निर्माण गरी कुल १२ समूहले भाग लिएका थिए ।
प्रतियोगितामा प्रथम कालीगण्डकी गाउँपालिकाको जनता माध्यमिक विद्यालय बिर्घा, द्वितीय आँधीखोला गाउँपालिकाका जनहीत माध्यमिक विद्यालय र तृतीय आँधीखोला गाउँपालिकाकै त्रिशहीद नमूना माध्यमिक विद्यालय भएका छन् ।
प्रतियोगितामा प्रथम, द्वितीय, तृतीय भएका बाजासमूहहरुले क्रमश ६ हजार, ५ हजार र ४ हजार नगदसहित प्रमाण पत्र प्राप्त गरेका थिए ।
