भीरकोट नगरपालिकाको नयाँ प्रतीक चिन्ह स्वीकृत
भदौ ३१, २०८०
नारायणप्रसाद कोइराला , स्याङ्जा
३१ भाद्र २०८०
स्याङ्जाको बालमैत्री भीरकोट नगरपालिकाले आफ्नै प्रतीक चिन्ह प्रयोग गर्ने निर्णय गरेको छ। आइतबार बसेको नगर कार्यपालिकाको १०४ औं बैठकले वडा नं ७ निवासी रिम बहादुर गोदारले तयार गरेको प्रतीक चिन्ह(लोगो) लाई स्वीकृत गरि प्रयोग गर्ने निर्णय गरेको प्रमुख प्रशासकीय अधिकृत धर्मराज ढुङ्गानाले जानकारी दिए।
स्वीकृत लोगोको प्रतीक चिन्हको दायाँ र बाँया भागमा रहेको धानको बालाले भीरकोट नगरपालिकाको मुख्य कृषि बालीहरुलाई जनाउँछ । धान लगायतका अन्न बालीहरु भीरकोट नगरपालिकाको प्रमुख खाद्यान्न बालीहरु हुन् । गण्डकी प्रदेशको दोश्रो तथा स्याङ्गजा जिल्लाकै पहिलो बालमैत्री नगरपालिका झल्काउन दायाँ बाँया बालमैत्री लोगो चिन्हलाई इङ्गित गरिएको छ ।
लोगोभित्र राखिएको भीरकोट कालिका, छायाँक्षेत्र मन्दिर, खिलुङ्ग कालिका मन्दिरको चिन्हले धार्मिक, सांस्कृतिक तथा ऐतिहासिक सम्पदाले भरीपूर्ण रहेको भीरकोट नगरपालिकालाई चिनाइएको छ। धार्मिक, ऐतिहासिक तथा पर्यटकीय आँधिखोलाले भीरकोटमा जलस्रोत र सिंचाईको सम्भावनालाई बुझाएको छ।उड्दै गरेको प्याराग्लाइडिङ्गले भीरकोट भित्र रहेका पर्यटकीय र साहसीक खेलको सम्भावनालाई इङ्गित गरेको छ ।
सम्भवत विश्वकै लामो गुफाको रुपमा रहेको गडहरे गुफाको संकेतले भीरकोटको पर्यटकीय सम्भावनालाई थप प्रष्ट पारेको छ । चन्द्र र सूर्य इंकित नेपालको राष्ट्रिय झण्डा भीरकोट नगरपालिकाका विभिन्न पर्यटकीय क्षेत्र हरूमा फरफराइरहेको इङ्गित गरिएको छ । छेउमा रहेको डाँडा काँडाले भीरकोट नगरपालिकामा रहेका बन पाखा हरियाली स्वरेक मैदान सुन्दरचौर, तामुको लेक, जन्तीढुंगा जस्ता पर्यटकीय सम्भावना बोकेका क्षेत्रलाई इङ्गित गरेको छ । भीरकोट नगरपालिकाको नक्साले भौगोलिक अवस्थिति साथै बनावट दर्शाएको छ । सँगै रहेको मितिले भीरकोट नगरपालिकाको स्थापना भएको मिति इङ्गित गरेको छ । नेपालको राष्ट्रिय फूल लालीगुराँस भीरकोटको खिलुङ्ग जस्ता विभिन्न पहाडी भागहरुमा पाईने तथा लालिगुराँस पार्क निर्माणको समेत सम्भावना रहेको कुरालाई इङ्गित गरिएको छ ।
नाँच्दै र बजाउँदै गरेको चिन्हले भीरकोटमा रहेको धार्मिक, सांस्कृतिक, लोक संस्कृति र जातीय विविधतालाई जनाउँछ । विद्यालयको चिन्ह र अस्पतालको चिन्हले भीरकोटमा रहेको शैक्षिक र स्वास्थ्य अवस्थाको बारेमा जनाउँछ । मन्दिरसँगै मस्दिज चिन्हले भीरकोट भीवका अनेक जातजातिविचको धार्मिक तथा भाइचारालाई जनाउँछ ।
पाठक, शुभेच्छुक र सरोकारवाला सबैमा हाम्रो अनुरोध :
