विभेदका विरुद्ध कडा सङ्घर्षमा उत्रिने स्याङ्जाका स्थानीय तहका कर्मचारीको तयारी
असोज २५, २०८०
स्याङ्जा जिल्ला अन्तर्गतका स्थानीय तहका कर्मचारीहरूले प्रस्तावित संघीय निजामती सेवा ऐनमा भएको विभेदका विरुद्ध एकताबद्ध भएर सङ्घर्षमा उत्रिने तयारी गरेका छन् l असोज १४ पछि स्थानीय तहका कर्मचारी चरणबद्ध आन्दोलनमा छन् । असोज २२ गते राजधानी केन्द्रित आन्दोलनमा प्रहरी हस्तक्षेप भएकोप्रति उनीहरुले गम्भीर आपत्ति समेत जनाएका छन् ।
बुधबार भएको छलफलपछि उनीहरुले एकताबद्ध भएर राज्यको विभेदका विरुद्ध सशक्त प्रतिकारमा उत्रिनुको विकल्प नभएको बताएका हुन् l “ प्रस्तावित सङ्घीय निजामती सेवा ऐनमा स्थानीय तहका कर्मचारीका हक अधिकारसँग सम्बन्धित विषय तथा सेवा सुविधा र वृत्ति विकास सम्बन्धी विषय नउठाइनु दुःखद् छ यसका विरुद्ध स्थानीय तहका कर्मचारीले कडा प्रतिकार गर्ने छन् l ” आन्दोलनमा सहभागी स्थानीय तह कर्मचारी सङ्घर्ष समिति स्याङ्जा जिल्लाका संयोजक तथा पुतलीबजार नगरपालिकाका शिक्षा अधिकृत गोविन्दराज सुबेदीले भने , “आन्दोलनमा राज्य पक्षले बल प्रयोग गरेको छ, सरकारको दमन गर्ने रणनीति हो भने हामी त्यसको उचित जवाफ दिन तयार छौं l”
