पत्रकार महासंघ स्याङ्जाको अध्यक्षमा कोइराला विजयी
मङि्सर २८, २०८१ 
स्मार्ट संवाददाता
स्मार्ट संवाददाता 
नेपाल पत्रकार महासंघ जिल्ला शाखा स्याङ्जाको अध्यक्षमा प्रदिप कोईराला विजयी हुनुभएको छ। स्याङ्जा शाखाको अध्यक्ष पदका लागि प्रेस सेन्टरका प्रतीक्षा काफ्ले र प्रेस युनीयन र प्रेस चौतारीका साझा उम्मेदवार प्रदिप कोइरालाको उम्मेदवारी रहेको थियो । नवनिर्वाचित अध्यक्ष कोइरालाले ३४ मत प्राप्त गर्दा प्रतिद्वन्दी काफ्लेले १३ मत प्राप्त गर्नुभएको थियो।
कोइरालाको नयाँ नेतृत्वमा १६ सदस्यीय कार्यसमिति चयन भएको हो । समितिको उपाध्यक्षमा माधव गैह्रे, महिला उपाध्यक्षमा साधना न्यौपाने, सचिवमा हरि प्रसाद सुवेदी (सुशील), समावेशी सह-सचिवमा कला राना, कोषाध्यक्षमा जोगराज पाठक निर्विरोध निर्वाचित हुनुभएको थियो।
महिला सदस्यमा आरती कुँवर, दलित सदस्यमा नारायण विश्वकर्मा, आदिवासी/जनजाती सदस्यमा भुम बहादुर रखाली (विनोद), राष्ट्रिय परिषद सदस्यमा ओम प्रकाश शर्मा र पार्वती पाण्डेय, महिला प्रदेश प्रतिनिधि सदस्यमा फुलमाया पाण्डेय भट्टराई र प्रदेश परिषद सदस्यमा टिकाराम अधिकारी, तोलाकान्त बगाले र रामु भट्टराई निर्विरोध निर्वाचित हुनुभएको थियो।
यसैगरी, सह-सचिव पदमा प्रतिद्वन्दी खेम प्रसाद खनाल (के.पि.) खनालले १६ मत प्राप्त गर्दा एक बहादुर गोदार (रमेश)ले ३० मत प्राप्त गरेर विजयी हुनुभयो । समावेशी सदस्यमा कामना सुनारले ११ मत ल्याउँदा हिमलाल घर्ती ३५ मत ल्याएर निर्वाचित हुनुभएको छ।
चार खुल्ला सदस्य पदका लागि पाँच जनाको उम्मेदवारी परेको थियो । जसमा युवराज पौडेलले ४१ मत, राम बहादुर रोकाहा र कृष्ण बस्यालले ४० /४० मत र सविनचन्द्र डोटेलले ३७ मत प्राप्त गरेर निर्वाचित हुनुभएको छ । अर्का उम्मेदवार शालिकराम पोख्रेलले भने १० मत मात्रै प्राप्त गर्नुभएको छ ।
नेपाल पत्रकार महासंघ जिल्ला शाखा स्याङ्जामा ५४ जना सदस्य रहेपनि जम्मा ४९ मत खसेको थियो । प्रेस युनियन र प्रेस चौतारीले गठबन्धन बनाएर चुनावमा भाग लिएको हुँदा चुनाव गठबन्धनका उम्मेदवार र प्रेस सेन्टरका उम्मेदवारबीच मात्रै भएको थियो । सहसचिव पदमा मात्रै एकबहादुर गोदार (रमेश) को स्वतन्त्र उम्मेदवारी रहेको थियो।
