६ बर्षदेखि अलपत्र भयो चापाकोटको कृषि क्याम्पस
मङि्सर १७, २०८०
सुनिल न्यौपाने,स्याङ्जा
१७ मंसिर २०८०, आइतबार
स्याङ्जाको चापाकोट नगरपालिका-८ रत्नपुरमा रहेको (तत्कालीन श्री जनसामूहिक प्राथमिक विद्यालय) प्रस्तावित प्राकृतिक स्रोत व्यवस्थापन कलेज अझै संचालन हुन सकेको छैन। लामो समयदेखि विवादित रहेको चापाकोट नगरपालिकामा कृषि तथा वन क्याम्पस अहिलेसम्म सञ्चालन हुने छाँटकाँट देखिएको छैन। जिल्लाका राजनीतिक दल र जनप्रतिनिधिहरुको छलफल हुँदै आएपनि चापाकोटमा कृषि तथा वन क्याम्पस सञ्चालन भएको छैन।
कृषि तथा वन विज्ञान विश्वविद्यालय रामपुर र चापाकोट नगरपालिकाको आयोजनामा यससम्बन्धी अन्तरक्रिया कार्यक्रम पनि भएको थियो । तर यहाँ सञ्चालन हुन लागेको कृषि तथा वन क्याम्पस राजनीतिक खिचातानीले सञ्चालन हुन नसक्नु दुःखद भएको यहाँका स्थानीयले बताएका छन । संघीय सरकार र प्रदेश सरकारले समेत क्याम्पस सञ्चालनमा कुनै चासो नदेखाएको आरोप स्थानीयको छ ।
कृषि तथा वन क्षेत्रको शिक्षा अध्ययन र कमाइसँगै हुने मोडेलबाट शुरु गर्नुपर्ने भन्दै चापाकोटमा क्याम्पस स्थापना गर्नका लागि अहिलेसम्म जग्गा व्यवस्थापन र सम्बन्धनको काम मात्र भएको जानकारहरुले बताएका छन। क्याम्पसको भौतिक पूर्वाधार, क्याम्पस सञ्चालन गर्न आवश्यक जनशक्तिका लागि तीन तहको सरकारलाई परिचालन गर्न भूमिका खेल्नुपर्ने यहाँका बुद्धिजीवीहरुले बताउदै आएका छन।
