व्यवसायिक पुष्प खेतीका लागि कृषि सामाग्री हस्तान्तरण
पुष ०३, २०७९
स्मार्ट संवाददाता, भीरकोट
३ पुस २०७९
भीरकोट नगरपालिकामा व्यवसायिक पुष्पखेती सुरू गर्न चाहने कृषकहरूलाई अत्यावश्यक कृषि सामाग्री हस्तान्तरण गरिएको छ। नगरपालिका र युएनडिपिको सहयोगमा संचालित हरित पुनरूत्थान तथा कोभिड १९ प्रतिकार्य पहल परियोजना अन्तर्गत ३१ जना कृषि सामाग्री हस्तान्तरण गरिएको हो। कृषकहरूलाई कुटो, कोदालो, फोरूवा, टनेल, स्प्रेयर, नर्सरी ट्रे, दाँते लगायतका सामाग्री र ७ थरी माला तथा सजावटका लागि प्रयोग हुने फूलका बीउहरू प्रदान गरिएको परियोजना प्रमुख हरि रेग्मीले जानकारी दिए। करिब ४ लाख ५० हजार रूपैयाँ बराबरको कृषि सामाग्री प्रदान गरिएको परियोजना प्रमुख रेग्मीले जानकारी दिए।
नगर प्रमुख गोबिन्द कुमार कर्माचार्यले नगरपालिकामा उद्यमशीलता विकास गर्न र पालिकालाई फूलमा आत्मनिर्भर बनाउन नगरपालिका लागि परेको बताए। तालिममा सिकेको सीप र परियोजनाले प्रदान गरेको कृषि सामाग्रीको सदुपयोग गरि उद्यमशील बन्न समेत उनले कृषकहरूलाई आग्रह गरेका थिए। पुष्प खेती गर्न चाहने कृषकहरूलाई यस अघि नै परियोजनाले तालीम दिइसकेको छ। नगरपालिकाको वडा नं २,४ र ९ मा व्यवसायिक फूल खेती गर्ने गरि कार्यक्रम अगाडि बढाइएको नगरपालिकाले जनाएको छ।
